रामानन्द चोकमा अचेत भेटिएका पुरुषको उपचारका क्रममा मृत्यु

जनकपुरधाम/असोज २० गते। धनुषाको जनकपुरधाम उपमहानगरपालिका–८ स्थित रामानन्द चोकमा अचेत अवस्थामा भेटिएका एक पुरुषको उपचारका क्रममा मृत्यु भएको छ।

जिल्ला प्रहरी कार्यालय धनुषाका अनुसार बुधबार बिहान करिब ११ः४० बजे रामानन्द चोकमा करिब ३५/३६ वर्षीय एक पुरुष अचेत अवस्थामा लडिरहेको अवस्थामा फेला परेका थिए।

घटनाबारे जानकारी पाएलगत्तै प्रहरी टोली घटनास्थलमा पुगेको थियो। प्रहरीले तत्काल उद्धार गरी उपचारका लागि प्रादेशिक अस्पताल जनकपुरधाम पुर्‍याएको थियो।

अस्पतालमा चिकित्सकले जाँच गर्दा ती पुरुषलाई दिउँसो करिब १२ बजे मृत घोषणा गरेका थिए।

प्रहरीका अनुसार मृतकको हालसम्म नाम, थर र वतन खुल्न सकेको छैन। उनको शव प्रादेशिक अस्पताल जनकपुरधाममा राखिएको छ।

मृतकको पहिचान खुलाउने प्रयास भइरहेको तथा घटनाको कारणबारे समेत थप अनुसन्धान भइरहेको जिल्ला प्रहरी कार्यालय धनुषाले जनाएको छ।