जनकपुरधाम/मंसिर ६ गते। । नेपालको जनकपुरधाम र भारतको अयोध्याधामबीच सिधा रेल सेवा सञ्चालन हुने भएको छ । भारतीय रेल मन्त्रालयले जनकपुरधाम–अयोध्या क्यान्ट–जनकपुरधाम साप्ताहिक एक्सप्रेस रेल सञ्चालनका लागि स्वीकृति दिएसँगै दुई धार्मिक नगरीबीच प्रत्यक्ष रेल सम्पर्क स्थापित हुन लागेको हो ।
नियमित रेल सेवा सुरु हुनुअघि सोमबार उद्घाटन विशेष रेल सञ्चालन गरिने भएको छ । रेल नम्बर ०४२९५/०४२९६ रहेको उक्त विशेष रेलमा १७ वटा डिब्बा रहनेछन् । यात्रुको सुविधाका लागि रेलमा सामान्य र वातानुकूलित दुवै श्रेणीका डिब्बा राखिएको छ ।
निर्धारित समयतालिकाअनुसार सोमबार दिउँसो १२:३० बजे भारतको अयोध्याधामबाट जनकपुरधामका लागि रेल प्रस्थान गर्नेछ । विभिन्न स्टेसनमा रोकिँदै उक्त रेल मंगलबार बिहान नेपाली समयअनुसार १० बजे जनकपुरधाम आइपुग्नेछ ।
त्यसैगरी, जनकपुरधामबाट मंगलबार दिउँसो १ बजे अयोध्याधामका लागि रेल छुट्नेछ । उक्त रेल बुधबार बिहान ८:१० बजे अयोध्याधाम पुग्ने समयतालिका तय गरिएको छ ।
अयोध्याधामबाट जनकपुरधाम आउने क्रममा रेल मनकापुर, बस्ती, गोरखपुर, पनियहवा, नरकटियागन्ज, रक्सौल, सीतामढी, शिशो हल्ट, मधुबनी र जयनगर कस्टम्स यार्ड हुँदै सञ्चालन हुनेछ । फर्कने क्रममा पनि रेल यही मार्ग प्रयोग गरी अयोध्या पुग्नेछ ।
नेपाल–भारत सीमा क्षेत्रमा पर्ने जयनगर कस्टम्स यार्डमा भन्सारलगायत आवश्यक प्रक्रिया पूरा गर्न रेल करिब एक घण्टा रोकिने व्यवस्था गरिएको छ ।
यद्यपि, उद्घाटन विशेष रेलको समयतालिका सार्वजनिक भए पनि नियमित साप्ताहिक रेल सेवा कुन बार सञ्चालन हुने भन्नेबारे पूर्व मध्य रेलवेले विस्तृत विवरण सार्वजनिक गर्न बाँकी रहेको छ ।
धार्मिक तथा सांस्कृतिक दृष्टिले महत्वपूर्ण मानिने जनकपुरधाम माता सीताको जन्मभूमि र अयोध्या भगवान् श्रीरामको जन्मभूमिका रूपमा परिचित छन् । यी दुई धार्मिक नगरीबीच प्राचीनकालदेखि नै धार्मिक, सांस्कृतिक तथा पौराणिक सम्बन्ध रहँदै आएको छ ।
सिधा रेल सेवा सञ्चालनमा आएपछि रामजानकी दर्शनका लागि नेपाल तथा भारतबाट आउने तीर्थयात्रीलाई आवतजावतमा सहज हुने अपेक्षा गरिएको छ । साथै, यसले नेपाल–भारतबीचको धार्मिक पर्यटन प्रवर्द्धन, सांस्कृतिक सम्बन्ध विस्तार र दुई देशका नागरिकबीचको आपसी सम्बन्धलाई थप मजबुत बनाउन महत्वपूर्ण भूमिका खेल्ने विश्वास गरिएको छ ।

















Discussion about this post