जनकपुरधाम स्थित राजदेवी माता,बौद्धी माता र अन्नपूर्णा माताको दशै पूजालाई व्यवस्थित बनाउन सर्वपक्षीय छलफल

जनकपुरधाम/असोज १० गते । श्रीराम युवा कमिटी तथा श्री महावीर युवा कमिटीको संयुक्त आयोजनामा जनकपुरधाम स्थित राजदेवी माता, बौद्धी माता तथा अन्नपूर्णा माताको दशै पूजा व्यवस्थापन एवं बोकाबलीसम्बन्धी विषयमा बृहत् सर्वपक्षीय छलफल कार्यक्रम सम्पन्न भएको छ।

छलफलमा धार्मिक तथा सांस्कृतिक पर्वलाई व्यवस्थित, सुरक्षित र मर्यादित रूपमा सम्पन्न गर्न आवश्यक व्यवस्थापन, सुरक्षा, सरसफाइ, ट्राफिक व्यवस्थापन तथा सरकारी सहयोगलगायतका विषयमा छलफल गरिएको थियो।

कार्यक्रममा जनता समाजवादी पार्टी, नेपालका केन्द्रीय सदस्य संजय कुमार चौधरीले आफ्ना विचार तथा सुझाव प्रस्तुत गर्दै धार्मिक तथा सांस्कृतिक पर्वलाई व्यवस्थित बनाउन तीनै तहका सरकारलाई आ–आफ्नो जिम्मेवारी प्रभावकारी रूपमा निर्वाह गर्न आग्रह गरे।

चौधरीले पूजा तथा मेलालाई लक्षित गरी सरसफाइ, सुरक्षा व्यवस्था र ट्राफिक व्यवस्थापनलाई प्रभावकारी बनाउनुपर्नेमा जोड दिए। साथै, मेलाका लागि आवश्यक सामग्रीको सहज आवागमन सुनिश्चित गर्न सीमा क्षेत्रमा भन्सार सहजीकरण तथा छुटको व्यवस्था गर्नुपर्ने र पूजा व्यवस्थापनका लागि सरकारले आवश्यक आर्थिक सहयोग उपलब्ध गराउनुपर्ने माग राखे।

उनले जनकपुरधाम उपमहानगरपालिकाका २५ वटै वडाका प्रमुख स्थान तथा विद्युत् पोलहरूमा पर्याप्त बत्तीको व्यवस्था गर्नसमेत नगरपालिकाको ध्यानाकर्षण गराए।

धार्मिक आस्था, संस्कृति, परम्परा, सुरक्षा र नागरिक सुविधालाई समेटेर पर्व व्यवस्थापन गर्न सके जनकपुरधामको धार्मिक तथा सांस्कृतिक पहिचान अझ सुदृढ हुने चौधरीको भनाइ थियो।

सर्वपक्षीय छलफलमा धनुषाका प्रमुख जिल्ला अधिकारी प्रेमप्रसाद लुइटेल, राष्ट्रिय स्वतन्त्र पार्टीका युवा नेता तथा जनकपुरधाम उद्योग वाणिज्य संघका पूर्वअध्यक्ष जितेन्द्र महासेठ, जनकपुरधाम उद्योग वाणिज्य संघका अध्यक्ष सुरेन्द्र भण्डारी, बृहत्तर जनकपुर क्षेत्र विकास परिषद्का अध्यक्ष कौशल किशोर झा, जनकपुरधाम उपमहानगरपालिकाका उपप्रमुख किशोरी साह, क्लबका अध्यक्ष तथा पूर्वअध्यक्ष, बुद्धिजीवी, समाजसेवी र पत्रकारहरूको समेत सहभागिता रहेको थियो।