२० लाख डलर लटरी जित्ने अमेरिकी महिला, तर दैनिकीमा आएन कुनै परिवर्तन

काठमाडौँ/असोज ९ गते। अमेरिकाकी एक महिलाले दिउँसोको विश्रामको समयमा २० लाख डलरको लटरी जितिन्।

उनको यो कथा सामाजिक सञ्जालमा निकै भाइरल भयो; तर मानिसहरू तब छक्क परे जब उनीहरूले थाहा पाए कि यति ठूलो रकम जित्दा पनि उनी आफ्नो बाँकी काम पूरा गर्न तुरुन्तै काममा फर्किइन्।

‘पिपुल्स’ म्यागजिनका अनुसार, भर्जिनियाकी ती महिलाको दिन तनावपूर्ण बितिरहेको थियो। त्यही क्रममा उनले केही खानेकुरा किन्ने र आफ्नो भाग्य अजमाउने निर्णय गरिन्। उनी ‘लभ फुड मार्ट’ नामक पसलमा पुगिन् र २० डलर पर्ने “प्लेटिनम सेभेन्स” स्क्र्याच-अफ लटरीको टिकट किनिन्।

पसलभित्रै टिकटको ‘स्क्र्याच’ (कोट्याउने भाग) खोल्दा उनले आफूले सबैभन्दा ठूलो ज्याकपोट जितेको थाहा पाइन्। तर खुसी मनाउनुको सट्टा, उनले आफ्नो खाजा खाने समय (लन्च ब्रेक) सकिन लागेको र काम अझै पूरा गर्न बाँकी रहेको महसुस गरिन्।

हल्लाखल्ला गर्ने वा जागिर छोड्ने काम गर्नुको साटो, ती महिलाले लाखौँ डलरको टिकट आफूसँगै राखिन्, आफ्नो काममा फर्किइन् र आफ्नो जिम्मेवारी पूरा गरिन् भनी बताइएको छ।

“मैले काममा फर्किएर केही नभएजस्तै गरी व्यवहार गर्नुपर्‍यो,” उनले आफ्नो पुरस्कार दाबी गर्ने क्रममा भर्जिनिया लटरीका अधिकारीहरूलाई सुनाइन्। साथै, उनले राज्यको गोपनीयतासम्बन्धी कानुनअनुसार आफ्नो परिचय गोप्य राख्ने निर्णय गरिन्।

आफूले जितेको रकम लिने बेला उनलाई दुईवटा विकल्प दिइएको थियो। उनले या त ३० वर्षसम्म वार्षिक किस्तामा पूरै २० लाख डलर लिन सक्थिन्, वा एकमुष्ट नगद रकम लिन सक्थिन्। सञ्चारमाध्यमका अनुसार उनले दोस्रो विकल्प रोजिन् र कर कट्टी हुनुअघि ९ लाख ५२ हजार डलर प्राप्त गरिन्।

भाग्यशाली टिकट बिक्री गर्ने पसलले पनि विजेता टिकट बेचेबापत बोनस प्राप्त गर्‍यो।

भर्जिनिया लटरीले जनाएअनुसार कानुनले “पुरस्कार विजेताहरूलाई आफ्नो परिचय गोप्य राखेर पुरस्कार दाबी गर्ने सुविधा दिन्छ; यसको अर्थ विजेताले लिखित अनुमति नदिएसम्म लटरीले विजेताको नाम, गृह-नगर वा जितेको रकम सार्वजनिक गर्नेछैन।”

त्यसयता उनले राजीनामा बुझाइन् वा बुझाइनन् भन्ने कुरा अझै स्पष्ट छैन।