बक्स अफिसमा पछारियो ‘टक्सिक’, निर्मातालाई ३०० करोडको घाटा

मुम्बई, २२ भदौ । यस वर्ष बक्स अफिसमा नराम्ररी असफल भएका चलचित्रहरूको सूची तयार पार्दा सुपरस्टार यश अभिनित चलचित्र ‘टक्सिक’ शीर्ष स्थानमा रहने देखिएको छ।

प्रदर्शनअघि निर्माताहरूले यस चलचित्रको व्यापक प्रचारप्रसार गरेका थिए र यसलाई लिएर दर्शकमाझ निकै उत्सुकता पनि थियो। तर हलमा प्रदर्शनमा आएपछि परिस्थितिले अर्कै मोड लियो। पहिलो दिन १०१ करोड रुपैयाँको कमाइ गर्दै आक्रामक सुरुवात गरे तापनि नौ दिनको अवधिमा यस चलचित्रले जम्मा २३९ करोड रुपैयाँ मात्र कमाउन सक्यो।

बक्स अफिसको कमजोर प्रदर्शनपछि चलचित्रले आफ्नो ओटीटी अधिकार बिक्रीका सन्दर्भमा पनि ठूलो धक्काको सामना गरिरहेको छ। ‘बलिउड हंगामा’ का अनुसार प्रदर्शन हुनुअघि यसको ओटीटी अधिकारका लागि निर्माताहरूलाई १५० करोड रुपैयाँको प्रस्ताव आएको थियो, जसलाई उनीहरूले अस्वीकार गरेका थिए। यश चलचित्र हलमा ब्लकबस्टर हुने र ओटीटी मूल्य २०० करोड रुपैयाँभन्दा माथि पुग्नेमा पूर्ण विश्वस्त थिए।

तर परिस्थिति उल्टिएपछि अहिले डिजिटल स्ट्रिमिङ प्लेटफर्महरू यसका सबै भाषाका संस्करणका लागि ३० करोड रुपैयाँभन्दा बढी तिर्न अनिच्छुक देखिएका छन्। हाल सबैभन्दा बढी प्रस्ताव ‘जी फाइभ’ बाट आएको बताइएको छ।

५०० देखि ६०० करोड रुपैयाँको भारी बजेटमा बनेको यस चलचित्रले ११ दिनमा विश्वभर ३३४.५० करोड रुपैयाँ मात्र कमाउन सकेको छ। समाचार अनुसार निर्माताहरूले यस चलचित्रबाट करिब ३०० करोड रुपैयाँसम्मको नोक्सानी बेहोर्नुपर्ने अवस्था आउन सक्छ। यदि यसो भएमा यो भारतीय चलचित्रको इतिहासमै सबैभन्दा बढी घाटा व्यहोर्ने चलचित्र बन्नेछ।

चलचित्रको कथावस्तु मुख्यतया वयस्क-केन्द्रित शैलीमा प्रस्तुत गरिएकाले टेलिभिजन च्यानलहरूमार्फत लगानी उठाउन पनि कठिन देखिएको छ। घाटा कम गर्न र ओटीटीमा राम्रो मूल्य पाउनका लागि निर्माताहरूले डिजिटल संस्करणमा व्यापक सम्पादन गरिरहेका छन्। विशेष गरी ओटीटी प्लेटफर्महरूका लागि चलचित्रको नयाँ संस्करण सार्वजनिक गर्ने र प्रस्ताव गरिएको रकम बढाउने रणनीतिमा टोली लागेको छ।

गत अगस्ट २६ मा हलहरूमा प्रदर्शन भएको यो चलचित्रलाई गीतू मोहनदासले निर्देशन गरेकी हुन्। चलचित्रमा यशका साथै कियारा आडवाणी, तारा सुतारिया, नयनतारा, रुक्मिणी वसन्त र हुमा कुरेशी मुख्य भूमिकामा छन्।