जनकपुरधाम/साउन २५ गते । अन्तर्राष्ट्रिय युवा दिवस २०२६ को अवसरमा मधेश प्रदेशस्तरीय कार्यक्रम सोमबार जनकपुरधाममा सम्पन्न भएको छ। ‘Different Contexts, Common Aspirations’ अर्थात् ‘भिन्न परिवेश, साझा आकांक्षा’ भन्ने मूल नाराका साथ मधेश प्रदेश सरकार, खेलकुद तथा समाज कल्याण मन्त्रालयको आयोजना तथा विभिन्न १३ वटा गैरसरकारी संस्था तथा विकास साझेदारको सहयोगमा कार्यक्रम आयोजना गरिएको हो।
राष्ट्रिय युवा सञ्जाल मधेश प्रदेशका अध्यक्ष मो. नयुम राईनको अध्यक्षतामा सम्पन्न कार्यक्रममा मधेश प्रदेश सरकारका खेलकुद तथा समाज कल्याण मन्त्री लखन दास प्रमुख अतिथिका रूपमा सहभागी थिए।
कार्यक्रमलाई सम्बोधन गर्दै मन्त्री दासले युवा राष्ट्र निर्माणको महत्वपूर्ण शक्ति भएको बताए। उनले अन्तर्राष्ट्रिय युवा दिवसलाई युवाको क्षमता, सम्भावना र भूमिकाको आत्ममूल्यांकन गर्ने अवसरका रूपमा लिनुपर्ने धारणा व्यक्त गरे।
मन्त्री दासले खेलकुद तथा समाज कल्याण मन्त्रालयले युवाहरूलाई आत्मनिर्भर बनाउन विभिन्न किसिमका सीपमूलक कार्यक्रम सञ्चालन गर्ने तयारी गरिरहेको जानकारी दिए। युवालाई सीपसँग जोड्दै रोजगारी तथा उद्यमशीलताको अवसर सिर्जना गर्न सरकार प्रतिबद्ध रहेको उनको भनाइ थियो।
उनले आर्थिक वर्ष २०८३/८४ को बजेटमा युवाहरूका लागि सहुलियत ब्याजदरमा ऋण उपलब्ध गराउने व्यवस्था गरिएको उल्लेख गर्दै त्यसबाट युवालाई व्यवसाय तथा उद्यम सञ्चालनमा सहयोग पुग्ने विश्वास व्यक्त गरे।
कार्यक्रममा सहभागी वक्ताहरूले युवाको विकासका लागि नीति निर्माण तहदेखि नै युवाको अर्थपूर्ण सहभागिता सुनिश्चित गर्नुपर्नेमा जोड दिएका थिए। उनीहरूले शिक्षा, सीप, रोजगारी, उद्यमशीलता, खेलकुद, प्रविधि तथा नेतृत्व विकासका क्षेत्रमा युवामैत्री कार्यक्रमलाई प्राथमिकता दिनुपर्ने धारणा राखे।
वक्ताहरूले युवाको क्षमता र ऊर्जालाई सही दिशामा परिचालन गर्न सके समाज तथा राष्ट्रको आर्थिक, सामाजिक र सांस्कृतिक विकासमा महत्वपूर्ण योगदान पुग्ने बताए। युवालाई केवल लाभग्राहीका रूपमा नभई नीति निर्माण र विकास प्रक्रियाका साझेदारका रूपमा स्थापित गर्नुपर्नेमा समेत उनीहरूले जोड दिएका थिए।
कार्यक्रममा खेलकुद तथा समाज कल्याण मन्त्रालयका प्रदेश सचिव सुशील साह, मधेश प्रदेश प्रहरी कार्यालयका प्रतिनिधि, गैरसरकारी संस्था महासंघ नेपाल मधेश प्रदेशका प्रतिनिधि, नेपाल पत्रकार महासंघ मधेश प्रदेशका महासचिव शैलेन्द्र महतो, युवा महाशाखाका प्रमुख निवेश यादव, सबल नेपालका नीरबहादुर आले, CFWA का लक्ष्मेश्वर मण्डल, UNFPA प्रदेश कार्यालयकी प्रिती शर्मा लगायतको सहभागिता रहेको थियो।
कार्यक्रममा युवाको सहभागिता, युवाका साझा आकांक्षा, युवाको भूमिका तथा समाज र राष्ट्र निर्माणमा युवाको योगदानलगायतका विषयमा विभिन्न छलफल तथा अन्तरक्रियात्मक सेसन सञ्चालन गरिएको थियो। सहभागी युवाहरूले आफ्ना अनुभव, समस्या, आवश्यकता तथा आगामी दिनमा सरकार र सरोकारवाला निकायबाट अपेक्षा गरेका विषयहरू प्रस्तुत गरेका थिए।
कार्यक्रमको अध्यक्षता गरेका राष्ट्रिय युवा सञ्जाल मधेश प्रदेशका अध्यक्ष मो. नयुम राईनले युवाहरूका लागि आवश्यक युवा मैत्री बजेट तथा नीति अझै पर्याप्त रूपमा आउन नसकेको गुनासो गरे। उनले युवाका आवश्यकता र आकांक्षालाई सम्बोधन गर्ने गरी आगामी दिनमा प्रदेश सरकारले युवा केन्द्रित बजेट तथा नीति निर्माण गर्ने अपेक्षा व्यक्त गरे।
राईनले अन्तर्राष्ट्रिय युवा दिवसको अवसरमा प्रदेशस्तरीय कार्यक्रम आयोजना गरेकोमा मधेश प्रदेशको खेलकुद तथा समाज कल्याण मन्त्रालयलाई धन्यवाद दिँदै युवाका सवाललाई प्राथमिकतामा राखेर आगामी दिनमा पनि यस्ता कार्यक्रमलाई निरन्तरता दिन आग्रह गरे।
उनले कार्यक्रम सफल बनाउन सहयोग गर्ने विकास साझेदार तथा गैरसरकारी संस्थाहरूको भूमिकाको प्रशंसा गर्दै उनीहरूलाई प्रशंसापत्रसहित सम्मान गरेका थिए। युवाको क्षमता विकास, नेतृत्व विकास र सामाजिक सहभागिता बढाउन सरकारी तथा गैरसरकारी क्षेत्रबीचको सहकार्य आवश्यक रहेको उनको भनाइ थियो। कार्यक्रमको उद्घाटन समारोहको सञ्चालन पिंकी शर्माले गरेकी थिइन्।
कार्यक्रममा विभिन्न साझेदार संस्थाका प्रतिनिधिहरूले पनि युवाका सवालमा आ–आफ्ना धारणा राखेका थिए। उनीहरूले युवालाई अवसर प्रदान गर्न सके उनीहरू विकासका सक्रिय साझेदार बन्न सक्ने बताएका थिए। साथै युवालाई सीप, प्रविधि, शिक्षा र रोजगारीसँग जोड्न तीनै तहका सरकार तथा विकास साझेदारबीच समन्वय आवश्यक रहेकोमा जोड दिइएको थियो।
कार्यक्रममा युनाइटेड नेसन्स डेभलपमेन्ट प्रोग्राम (UNDP), सेभ द चिल्ड्रेन, वर्ल्ड भिजन, युनिसेफ, UNFPA, लाइफ नेपाल, आसमान नेपाल, YUWAH, CFWA, सबल नेपाल, सपोर्ट नेपाल तथा IRDS लगायतका संस्थाहरू साझेदारका रूपमा रहेका थिए।
हरेक वर्ष युवाका मुद्दा, सम्भावना, अधिकार र योगदानलाई प्राथमिकतामा राख्दै अन्तर्राष्ट्रिय युवा दिवस मनाइँदै आएको छ। मधेश प्रदेशमा आयोजित यस प्रदेशस्तरीय कार्यक्रमले प्रदेशका विभिन्न क्षेत्रका युवालाई एउटै मञ्चमा जोड्दै उनीहरूका साझा सवाल र आकांक्षामाथि छलफल गर्ने अवसर प्रदान गरेको आयोजकको भनाइ छ। आजको कार्यक्रममा युवाहरुले घोषणापत्र पनि जारी गर्दै उक्त घोषणापत्र मन्त्रालयलाई हस्तान्तरण गरेको छ।
युवाको क्षमता, नेतृत्व विकास, सामाजिक सहभागिता र उद्यमशीलतालाई प्रोत्साहन गर्दै उनीहरूलाई समाज तथा राष्ट्र निर्माणको मूलधारमा प्रभावकारी रूपमा सहभागी गराउन यस्ता कार्यक्रमले महत्वपूर्ण भूमिका खेल्ने विश्वास गरिएको छ।
Discussion about this post