काठमाडौ/साउन १२ गते । लियो जिल्ला परिषद् ३२५ एफ नेपालको आयोजनामा दुईदिने ‘बोर्ड स्कुलिङ, क्लब पीभीएसटीएम एण्ड युथ लिडर्स ट्रेनिङ’ कार्यक्रम सफलतापूर्वक सम्पन्न भएको छ। काभ्रेपलाञ्चोकको धुलिखेलस्थित धुलिखेल सनराइज रिसोर्टमा जुलाई २५ र २६ गते आयोजित प्रशिक्षणमा देशभरका ६० भन्दा बढी लियो तथा लायन्स सदस्यहरूको सहभागिता रहेको थियो।
कार्यक्रम लियो जिल्ला परिषद् ३२५ एफ नेपाल २०२६/२७ का जिल्ला अध्यक्ष लियो आकाश साहको अध्यक्षता तथा लायन्स इन्टरनेसनल डिस्ट्रिक्ट ३२५ एफ नेपालका जिल्ला गभर्नर लायन्स अजय प्रसाद खनालको प्रमुख आतिथ्यतामा सम्पन्न भएको हो।
उद्घाटन सत्रमा अध्यक्ष आकाश साहले सहभागी सम्पूर्ण लियो तथा लायन्स सदस्यलाई स्वागत गर्दै खादा, माला र प्रशंसापत्रद्वारा सम्मान गरेका थिए। उनले आफूलाई जिल्ला अध्यक्षको जिम्मेवारीसम्म पुर्याउन सहयोग गर्ने सम्पूर्ण लियो तथा लायन्स परिवारप्रति आभार व्यक्त गर्दै नेतृत्व विकास र सेवा भावनालाई अझ प्रभावकारी बनाउने प्रतिबद्धता जनाए।
कार्यक्रमका विशिष्ट अतिथि तथा जिल्ला लियो क्लब चेयरपर्सन एवं पूर्व जिल्ला गभर्नर फोरम नेपालका अध्यक्ष लायन्स मधुकर उपाध्यायले लियो क्लबको इतिहास, स्थापना, उद्देश्य, मूल्य–मान्यता तथा संगठनात्मक भूमिकाबारे प्रशिक्षण दिएका थिए। त्यस्तै लायन्स रामहरि फुयाँलले डिजिटल नेतृत्व र आधुनिक प्रविधिको प्रभावकारी प्रयोग सम्बन्धी प्रशिक्षण दिएका थिए।
प्रशिक्षणका क्रममा लायन्स रविन्द्र रिमालले क्लबको वार्षिक प्रतिवेदन, बजेट निर्माण, वित्तीय योजना तथा क्लब सञ्चालनका लागि आवश्यक व्यवस्थापन प्रक्रियाबारे विस्तृत जानकारी गराएका थिए। दोस्रो दिन लायन्स सन्तोष राईले वित्तीय साक्षरता, वित्तीय व्यवस्थापन, स्पोन्सरसिप व्यवस्थापन तथा वित्तीय पारदर्शिताका विषयमा सहजीकरण गरेका थिए।
दोस्रो दिनको अन्तिम सत्रमा लियो आकाश दाहालले लियो क्लबका अध्यक्ष, सचिव, कोषाध्यक्ष तथा विभिन्न समितिका पदाधिकारीहरूको काम, कर्तव्य, अधिकार र जिम्मेवारीका विषयमा प्रशिक्षण दिएका थिए।
कार्यक्रमको उद्घाटन सत्रमा निवर्तमान जिल्ला अध्यक्ष लियो आकृति न्यौपाने, लायन्स मनोज सापकोटा, लायन्स किशोर भक्त श्रेष्ठ, लायन्स रविन्द्र रिमाल लगायत जिल्ला सल्लाहकारहरू लायन्स प्रणिता शर्मा बराल, लायन्स भुवन प्रसाद नेपाल, लायन्स इन्द्रबहादुर कार्की, लायन्स डा. सुवासकुमार घिमिरे, लायन्स उद्धवबहादुर महरा, लायन्स जीवनाथ खतिवडा, लायन्स सुमन सिंह थापा, लायन्स प्रज्वलन भट्टराई, लायन्स सन्तोष यादव तथा लियो श्रेयास पौडेलको उपस्थिति रहेको थियो।
समापन समारोहका प्रमुख अतिथि लायन्स इन्टरनेसनल मल्टिपल डिस्ट्रिक्ट ३२५ का पूर्व मल्टिपल डिस्ट्रिक्ट प्रेसिडेन्ट (लायन्स वर्ष २०००/०१) लायन्स पूर्ण प्रसाद पालनचौकी रहेका थिए भने विशेष अतिथिका रूपमा लियो श्रेयास पौडेल सहभागी भएका थिए।
यसैगरी जिल्ला कोषाध्यक्ष लियो लायन्स निराजन कुशवाहा, रिजन मिथिला चेयरपर्सन लियो लायन्स दीपेश कुमार सिंह, एरिया कोर्डिनेटर लियो राज साह, डिस्ट्रिक्ट स्ट्राटेजी डाइरेक्टर लियो विकास साह, रिजन स्वयम्भूनाथ चेयरपर्सन लियो सुजय श्रेष्ठ तथा कमिटी डाइरेक्टर लियो रजनीश कुमार सिंह लगायतको उपस्थिति रहेको थियो।
आयोजकका अनुसार प्रशिक्षणले सहभागीहरूमा नेतृत्व क्षमता, संगठन सञ्चालन, वित्तीय अनुशासन तथा सेवा भावनाको विकास गर्न महत्वपूर्ण भूमिका खेलेको छ। लियो अभियानलाई अझ प्रभावकारी, जिम्मेवार र परिणाममुखी बनाउने उद्देश्यका साथ सञ्चालन गरिएको प्रशिक्षणले सदस्यहरूबीच सहकार्य, एकता र नेतृत्व विकासलाई थप मजबुत बनाउने विश्वास व्यक्त गरिएको छ।
कार्यक्रम सञ्चालक तथा लियो जिल्ला परिषद् ३२५ एफ नेपालका जिल्ला सचिव लकेश अधिकारीका अनुसार ‘Service Above Self’ (स्वार्थभन्दा माथि सेवा) भन्ने मूल नारालाई आत्मसात् गर्दै सम्पन्न भएको यस प्रशिक्षणले आगामी दिनमा लियो क्लबहरूको गतिविधिलाई अझ सशक्त र प्रभावकारी बनाउने अपेक्षा गरिएको छ।
Discussion about this post