गिरिजानन्द साह/जनकपुरधाम/साउन १० गते। पिछडावर्ग (ओबीसी) महासभाको केन्द्रीय विस्तारित भेला तथा पिछडावर्ग (ओबीसी) जातजातिहरूको सर्वाङ्गीण विकासमा मधेश प्रदेश सरकारको भूमिकाबारे अन्तरसंवाद कार्यक्रम आइतबार जनकपुरधाममा सम्पन्न भएको छ।
महासभाका केन्द्रीय अध्यक्ष रामकुमार महतोको अध्यक्षतामा सम्पन्न भेलामा संगठन सुदृढीकरण, आर्थिक तथा सांगठनिक गतिविधि, आगामी महाधिवेशन र ओबीसी समुदायको हक–अधिकार सुनिश्चित गर्न सञ्चालन गरिने कार्यक्रमबारे विस्तृत छलफल गरिएको छ।
भेलाबाट आर्थिक वर्ष २०८२/०८३ को लेखापरीक्षण प्रतिवेदन अनुमोदन गर्ने निर्णय गरिएको छ। साथै आर्थिक वर्ष २०८३/०८४ का कार्यक्रम अनुमोदन, पालिका, जिल्ला, प्रदेश र राष्ट्रिय महाधिवेशनको तयारीलाई तीव्र बनाउने निर्णय गरिएको ओबीसी महासभाको महासचिव नथुनी महतोले बताएका छ्न ।
साथै भेलाले जिल्ला र प्रदेश तहका इन्चार्ज, संयोजक तथा भ्रातृ संगठनका केन्द्रीय संयोजक र विभागीय प्रमुखहरू तोक्ने अधिकार केन्द्रीय समितिलाई प्रदान गरेको नथुनी महतोले बताए । साथै आगामी दिनमा संगठनलाई थप सक्रिय, अनुशासित र जनमुखी बनाउँदै ओबीसी समुदायका अधिकार सुनिश्चित गर्न सबै तहमा समन्वय र सहकार्य बढाउने प्रतिबद्धता पनि व्यक्त महतोले बताएका छ्न ।
कार्यक्रममा अतिथीहरुमा मगही भाषा साहित्यकार डा.वीर बहादुर महतो,ओबीसी महासभाको सर्लाही जिल्ला अध्यक्ष श्याम किशोर,ओबीसीका अगुवा तथा पुर्व प्रदेश अध्यक्ष राम प्रीत यादव रहेको थियो। कार्यक्रमको संचालन ओबीसी महासभाको महासचिव नथुनी महतोले गरेको थियो।
कार्यक्रममा वक्ताहरूले नेपालमा ओबीसी समुदायको जनसंख्या उल्लेख्य भए पनि शिक्षा, रोजगारी, प्रशासन, राजनीति तथा नीति निर्माण तहमा अपेक्षित प्रतिनिधित्व हुन नसकेको भन्दै त्यसको समाधानका लागि राज्यले विशेष नीति अवलम्बन गर्नुपर्ने धारणा राखेका थिए। उनीहरूले सामाजिक न्याय, समान अवसर र समावेशी विकासको अवधारणालाई व्यवहारमा लागू नगरेसम्म पिछडावर्ग समुदायको वास्तविक उत्थान सम्भव नहुने बताएका थिए।
कार्यक्रमको अन्त्यमा महासभाका अध्यक्ष रामकुमार महतोले ओबीसी समुदायको एकता नै अधिकार प्राप्तिको मुख्य आधार भएको उल्लेख गर्दै संगठन विस्तार, जनजागरण र अधिकारमुखी आन्दोलनलाई आगामी दिनमा अझ प्रभावकारी रूपमा अघि बढाइने बताए। उनले समुदायका साझा मुद्दामा सबैलाई एकताबद्ध भई सक्रिय भूमिका निर्वाह गर्न आग्रह गर्दै भेलाबाट पारित निर्णयहरू कार्यान्वयनमा सबै तहका पदाधिकारीलाई जिम्मेवार भएर लाग्न निर्देशन दिएका थिए।
Discussion about this post