काठमाडौं /साउन १० गते। शिक्षा तथा खेलकुद मन्त्री सस्मित पोखरेलले त्रिभुवन विश्वविद्यालय व्यवस्थापन सङ्कायअन्तर्गत एमबीएस प्रथम सत्रको परीक्षाको प्रश्नपत्र सार्वजनिक गर्ने घटनामा संलग्न दोषीलाई कानुनबमोजिम कारबाही गरिने बताएका छन्।
मन्त्रालयमा सञ्चारकर्मीसँग कुरा गर्दै मन्त्री पोखरेलले प्रश्नपत्र सार्वजनिक प्रकरणमा संलग्न भएको आरोपमा दुई जनालाई नेपाल प्रहरीले नियन्त्रणमा लिएर अनुसन्धान अघि बढाएको जानकारी दिए।
उनका अनुसार प्रश्नपत्र सार्वजनिक भएको जानकारी प्राप्त हुनासाथ गृह मन्त्रालय र नेपाल प्रहरीसँग समन्वय गरी तत्काल निगरानी बढाइएको थियो।
मन्त्री पोखरेलले विगतमा पनि यस्ता घटना दोहोरिँदै आएको उल्लेख गर्दै यसपटक भने तत्काल अनुसन्धान र कारबाही प्रक्रिया अघि बढाइएको बताए। सुशासनविरुद्ध हुने कुनै पनि गतिविधिमा संलग्न जोसुकैलाई कानुनअनुसार कारबाही गरिने उनले स्पष्ट पारे।
घटनाको विस्तृत अनुसन्धानपछि सत्यतथ्य सार्वजनिक गरिने मन्त्री पोखरेलले बताए।
प्रश्नपत्र सार्वजनिक गरेको आरोपमा नेपाल प्रहरीको केन्द्रीय अनुसन्धान ब्युरो (सीआईबी) ले दुई जनालाई नियन्त्रणमा लिएर थप अनुसन्धान गरिरहेको छ।
गत साउन ८ गते सञ्चालन भएको त्रिभुवन विश्वविद्यालय व्यवस्थापन सङ्कायअन्तर्गत एमबीएस प्रथम सत्रको ‘अर्गनाइजेशनल बिहेबियर’ विषयको परीक्षा सुरु भएको केही मिनेटमै प्रश्नपत्र सामाजिक सञ्जालमा सार्वजनिक भएपछि उक्त घटनाबारे अनुसन्धान सुरु गरिएको हो।
Discussion about this post