हराएका ३१ मोबाइल धनीको हातमा, गरुडा प्रहरीको प्रविधिमैत्री अनुसन्धान सफल

सञ्जय मिश्रा/रौतहट/साउन ८ गते। रौतहटको इलाका प्रहरी कार्यालय गरुडा ले आधुनिक प्रविधि र प्रभावकारी अनुसन्धानको सहायताले आर्थिक वर्ष २०८२÷८३ को मात्र तीन महिना मै ३१ थान हराएका मोबाइल फोन फेला पारेर सम्बन्धित वास्तविक धनीलाई हस्तान्तरण गरेको छ।

प्रहरीको यो उपलब्धिले नागरिकमा सुरक्षा निकायप्रतिको भरोसा थप मजबुत बनाएको हो। इलाका प्रहरी कार्यालय गरुडाका प्रमुख डीएसपी शंकर प्रसाद आचार्य को नेतृत्वमा सञ्चालन गरिएको विशेष खोजी अभियानअन्तर्गत गत बैशाखदेखि असार मसान्तसम्म विभिन्न स्थानबाट हराएका मोबाइल आई एम ई आई ट्र्याकिङ, डिजिटल विश्लेषण तथा प्राविधिक अनुसन्धान को माध्यमबाट फेला पारिएको प्रहरीले जनाएको हो।

आजको डिजिटल युगमा मोबाइल फोन केवल सञ्चारको साधन मात्र होइन, व्यक्तिगत विवरण, बैंकिङ सेवा, सामाजिक सञ्जाल, सरकारी कागजात तथा अन्य महत्वपूर्ण सूचनाको भण्डार पनि हो। त्यसैले हराएको मोबाइल फेला पारेर धनीलाई सुरक्षित रूपमा फिर्ता गर्नु केवल सामान फिर्ता गराउने कार्य नभई नागरिकको डिजिटल सुरक्षाप्रति प्रहरीको जिम्मेवारी र प्रतिबद्धताको उदाहरण बनेको छ।

डीएसपी आचार्यले गरुडा प्रहरीको नेतृत्व सम्हालेयता शान्ति–सुरक्षा सुदृढीकरण, अपराध नियन्त्रण, समुदाय–प्रहरी साझेदारी र प्रविधिमैत्री अनुसन्धान लाई उच्च प्राथमिकतामा राख्दै आएका छन्। त्यसकै सकारात्मक परिणामस्वरूप हराएका मोबाइल फेला पार्ने, फरार अभियुक्त पक्राउ गर्ने तथा जनमैत्री सेवा प्रवाहमा उल्लेखनीय सुधार देखिएको स्थानीयवासी बताउँछन्।

नेपाल प्रहरीले पछिल्ला वर्षहरूमा प्रविधिमा आधारित अनुसन्धान प्रणाली लाई विस्तार गर्दै आएको छ। आई एम ई आई ट्र्याकिङ, डिजिटल सूचना विश्लेषण र अन्तर–जिल्ला समन्वयको प्रभावकारी प्रयोगले हराएका मोबाइल फेला पार्ने सफलता दर उल्लेखनीय रूपमा बढ्दै गएको देखिन्छ। गरुडा प्रहरीको पछिल्लो उपलब्धि त्यसैको एक सफल उदाहरण बनेको छ।

विशेषगरी भारतसँग सीमा जोडिएको रौतहट जस्तो जिल्लामा हराएका मोबाइल सीमापार पुग्ने वा पुनः बिक्री हुने सम्भावना उच्च रहने भएकाले यस्ता घटनाको अनुसन्धान चुनौतीपूर्ण मानिन्छ। त्यसका बाबजुद मात्र तीन महिनामा ३१ थान मोबाइल फेला पारेर धनीलाई बुझाउन सफल हुनु गरुडा प्रहरीको अनुसन्धान क्षमता, सक्रियता र प्रविधिको प्रभावकारी प्रयोगको प्रमाण भएको सरोकारवालाहरूको भनाइ छ।

प्रहरीले मोबाइल हराएपछि ढिलाइ नगरी नजिकको प्रहरी कार्यालयमा निवेदन दिन, आई एम ई आई नम्बर सुरक्षित राख्न तथा आवश्यक विवरण उपलब्ध गराउन नागरिकलाई आग्रह गरेको छ। यसले हराएका मोबाइल खोजी गरी वास्तविक धनीसम्म पुर्‍याउने प्रक्रिया अझ प्रभावकारी हुने प्रहरीको विश्वास छ।