सर्लाहीमा प्रेमिकासँग विवाह गराइदिनुपर्ने माग राख्दै ८० मिटर अग्लो टावरमा चढेका युवकको सकुशल उद्धार

सर्लाही/श्रावण ३ गते। सर्लाहीमा प्रेमिकासँग विवाह गराइदिनुपर्ने माग राख्दै नेपाल टेलिकमको करिब ८० मिटर अग्लो टावरमा चढेका एक युवकको सकुशल उद्धार गरिएको छ।

जिल्लाको गोडैता नगरपालिका – ९ बकैनिया निवासी करिब २४ वर्षीय अफसर आलम हुसेन आइतबार बिहान मलंगवा नगरपालिका – ९ स्थित नेपाल टेलिकम कार्यालय परिसरभित्र रहेको अग्लो टावरमा चढेका थिए।

टावरमा पुगेपछि उनले आफ्ना एक साथीलाई फोन गरी आफू माथि रहेको जानकारी गराएका थिए। त्यसपछि घटनाबारे प्रहरीलाई खबर पुगेको थियो। घटनास्थल पुगेका प्रहरीका अनुसार हुसेनले आफ्नी प्रेमिकासँग विवाह गराइदिनुपर्ने माग राख्दै प्रेमिकालाई घटनास्थलमा बोलाउन आग्रह गरेका थिए।

माग पूरा नभए टावरबाट हाम फाल्ने चेतावनी दिएपछि केही समय उक्त क्षेत्रमा स्थानीयको ठूलो भीडसमेत जम्मा भएको थियो। सूचना प्राप्त हुनासाथ जिल्ला प्रहरी कार्यालय सर्लाही, नेपाली सेना तथा अन्य सुरक्षा निकायको टोली घटनास्थलमा पुगेको थियो। सुरक्षाकर्मी र उनका परिवारले टावरमुनिबाट तथा फोनमार्फत निरन्तर संवाद गर्दै युवकलाई सम्झाइ बुझाइ गरेका थिए।

लामो प्रयासपछि सुरक्षाकर्मीले हुसेनलाई सकुशल टावरबाट तल झार्न सफल भएका हुन्। उद्धारपछि उनको स्वास्थ्य अवस्था सामान्य रहेको प्रहरीले जनाएको छ। अहिले उनलाई जिल्ला प्रहरी कार्यालय सर्लाहीमा लगिएको बताईएको छ।

प्रारम्भिक जानकारीअनुसार हुसेन सर्लाही क्याम्पसमा बीबीए अध्ययनरत विद्यार्थी हुन्। उनी र सोही क्याम्पसमा अध्ययनरत एक युवतीबीच प्रेम सम्बन्ध रहेको बताइए पनि घटनाको वास्तविक कारण तथा अन्य पक्षबारे प्रहरीले थप अनुसन्धान गरिरहेको जनाएको छ।