जनताको पीडा नबुझ्ने सरकारको आयु लामो हुन सक्दैन : पूर्वउपप्रधानमन्त्री रघुवीर महासेठ

जनकपुरधाम/श्रावण २ गते । नेकपा (एमाले)का नेता तथा पूर्वउपप्रधानमन्त्री रघुवीर महासेठले प्रतिपक्ष दलसँग सहकार्य नगरी एकलौटी ढंगले अघि बढ्न खोज्ने सरकार दीर्घकालीन रूपमा टिक्न नसक्ने बताएका छन् ।

जनकपुरधाम उद्योग वाणिज्य संघको ५८औँ वार्षिक साधारण सभालाई सम्बोधन गर्दै उनले वर्तमान सरकारको तत्काल आलोचना गर्न आफू इच्छुक नरहेको बताए । “सरकार गठन भएको करिब चार महिना मात्र भएको छ । सरकारले प्रारम्भिक तीन महिनाभित्र परिणाम दिने प्रतिबद्धता जनाएको थियो, तर त्यसअनुसार काम भएको देखिएको छैन । आगामी दिनको समीक्षा समय आएपछि गरौँला,” उनले भने ।
पूर्वमन्त्री महासेठले मधेश प्रदेशले वर्तमान सरकारलाई ३२ मध्ये ३० सिट जिताएर बलियो जनादेश दिएको स्मरण गराउँदै सरकारले त्यही जनतामाथि करको भार थपेको आरोप लगाए ।

उनले मधेश प्रदेश गरिबी, अशिक्षा, बेरोजगारी तथा स्वास्थ्य सेवाको पहुँचजस्ता आधारभूत समस्यासँग जुधिरहेको उल्लेख गर्दै यस्ता समस्या समाधान गर्नुको सट्टा सरकारले कर बढाएर जनतालाई थप दुःख दिएको बताए ।

“जनताको पीडा नबुझ्ने, उनीहरूलाई बेवास्ता गर्ने सरकारको आयु लामो हुँदैन । जनताले सरकारका हरेक गतिविधिलाई नजिकबाट नियालिरहेका छन्,” उनले भने ।

वक्ताहरूले मुलुक आर्थिक मन्दीको चपेटामा परेको उल्लेख गर्दै व्यापार–व्यवसायको संरक्षण र प्रवद्र्धनमा सरकार गम्भीर नभए देशले अझ ठूलो आर्थिक संकट सामना गर्नुपर्ने चेतावनी दिएका थिए ।

जनकपुर उद्योग वाणिज्य सङ्घको सभा हलमा आयोजित कार्यक्रम सङ्घका अध्यक्ष सुरेन्द्र भण्डारीको अध्यक्षतामा सम्पन्न भएको थियो। कार्यक्रममा जनकपुरधाम उपमहानगरपालिकाका मेयर मनोज कुमार साह, पूर्व मेयर लालकिशोर साह, पूर्व मेयर बजरङ्ग प्रसाद साह तथा जनकपुर उद्योग वाणिज्य सङ्घका पूर्व अध्यक्ष निर्मल चौधरीलगायतले शुभकामना मन्तव्य व्यक्त गरेका थिए।

कार्यक्रमका अवसरमा जनकपुर उद्योग वाणिज्य सङ्घले विभिन्न सङ्घ–संस्था तथा उद्योग, व्यापार, सामाजिक र अन्य क्षेत्रमा योगदान पुर्‍याएका व्यक्तित्वहरूलाई सम्मान पनि गरेको थियो।

त्यसैगरी, नेपाल पत्रकार महासङ्घ धनुषाका अध्यक्ष पुरण गुप्ताले स्थानीय उद्योग, व्यापार तथा प्रतिष्ठानहरूको विकास, प्रवर्द्धन र व्यवसाय विस्तारका लागि सञ्चार माध्यमको भूमिका महत्वपूर्ण हुने उल्लेख गर्दै सम्पूर्ण सञ्चार माध्यमलाई नियमित रूपमा विज्ञापन उपलब्ध गराउन उद्योगी तथा व्यवसायीलाई आग्रह गरेका थिए।

कार्यक्रममा सङ्घका पूर्व अध्यक्ष, उद्योगी–व्यवसायी, विभिन्न सङ्घसंस्थाका प्रतिनिधि सञ्चारकर्मी लगायतको व्यक्तिहरूको उपस्थिति रहेको थियो।कार्यक्रममा विभिन्न क्षेत्रमा उल्लेखनीय योगदान पु¥याएका व्यक्तित्वहरूलाई मायाको चिनो सहित सम्मान गरिएको थियो ।