जनकपुरधाममा एक व्यवसायी माथि आक्रमण

जनकपुरधाम/श्रावण २ गते। राजधानी ट्रेडर्स एन्ड सप्लायर्सका सञ्चालक बलराम साह माथि गएराति पसल बन्द गर्ने क्रममा आक्रमण भएको घटनाप्रति सर्वत्र गम्भीर चासो व्यक्त गरिएको छ।स्रोतका अनुसार घाइते साहको उपचार भइरहेको छ

।शान्तिपूर्ण समाजमा यस्ता आपराधिक गतिविधि कुनै पनि हालतमा स्वीकार्य हुन नसक्ने भन्दै घटनामा संलग्न व्यक्तिहरूको तत्काल पहिचान गरी निष्पक्ष अनुसन्धानका आधारमा कानुनी कारबाही गर्न जनकपुर उद्योग वाणिज्य सङ्घका पूर्व अध्यक्ष जितेन्द्र महासेठले समाजिक सञ्जाल मार्फत माग गरिएको छ।

साथै, दोषीलाई कुनै पनि बहानामा उन्मुक्ति नदिई कानुनको दायरामा ल्याई पीडितलाई न्याय सुनिश्चित गर्नुपर्ने आवाज उठाइएको छ। नागरिकको सुरक्षाको प्रत्याभूति गराउनु राज्यको प्रमुख दायित्व भएकाले अपराधमा संलग्न जोसुकै भए पनि कडा कारबाही हुनुपर्ने सरोकारवालाहरूको भनाइ छ।

उता, जिल्ला प्रहरी कार्यालय धनुषाका प्रवक्ता डीएसपी मधुसूदन न्यौपानेका अनुसार घटनाको गम्भीरतापूर्वक अनुसन्धान भइरहेको छ। उनका अनुसार हालसम्म घटनामा संलग्न कुनै पनि व्यक्ति पक्राउ परेका छैनन्। प्रहरीले घटनाका सबै पक्षको सूक्ष्म अनुसन्धान गरिरहेको र दोषीको पहिचान भएपछि कानुनबमोजिम आवश्यक कारबाही गरिने जनाएको छ।