रास्वपाको प्रथम महाधिवेशनमा नेताहरूको जोड : ‘राजनीतिक संस्कार परिवर्तन र परिणाममुखी शासन’

चितवन /असार ७ गते। राष्ट्रिय स्वतन्त्र पार्टी (रास्वपा) को प्रथम महाधिवेशनमा पार्टीका शीर्ष नेताहरूले नेपालको राजनीतिमा नयाँ संस्कार, उत्तरदायी शासन र परिणाममुखी नेतृत्वको आवश्यकता औंल्याएका छन्।

भरतपुरस्थित गेस्टहाउस चौरमा आयोजित महाधिवेशनको उद्घाटन पार्टी सभापति रवि लामिछाने र वरिष्ठ नेता बालेन शाहले संयुक्त रूपमा गरेका थिए। उद्घाटन सत्रमा पार्टीका नेताहरूले रास्वपाको उदयलाई नागरिकको परिवर्तनको चाहनाको राजनीतिक अभिव्यक्तिका रूपमा व्याख्या गर्दै आगामी दिनमा पार्टीले वैकल्पिक राजनीतिक शक्तिका रूपमा आफूलाई स्थापित गर्ने बताएका छन्।

उद्घाटन समारोहलाई सम्बोधन गर्दै उपसभापति डा. स्वर्णिम वाग्लेले रास्वपाको लक्ष्य केवल सरकार परिवर्तन नभई राजनीतिक संस्कार परिवर्तन रहेको बताए। उनले इमानदार व्यक्तिलाई राजनीतिमा प्रवेश गर्न कठिन र पहुँचवालालाई सफल हुन सहज हुने विद्यमान संरचना बदल्नुपर्ने आवश्यकता औंल्याए।

उनले नेपालमा लोकतन्त्र, संविधान र समावेशिताको आधार निर्माण भए पनि संस्थागत लोकतन्त्र अपेक्षित रूपमा बलियो बन्न नसकेको उल्लेख गर्दै विवेक, विधि र नियममा आधारित शासन प्रणाली निर्माण गर्नुपर्ने धारणा राखे। “हामी कसैलाई हराउनभन्दा नेपाललाई जिताउन आएका हौँ,” उनले भने।

वाग्लेले रास्वपा आन्दोलनको पार्टीबाट संस्थागत राजनीतिक शक्तिमा रूपान्तरण भइरहेको बताउँदै उदार लोकतन्त्र, प्रतिस्पर्धी अर्थतन्त्र, समन्यायिक समाज र सक्षम राज्य निर्माण पार्टीको दीर्घकालीन लक्ष्य रहेको स्पष्ट पारे।

महाधिवेशनमा सहभागी अन्य नेताहरूले पनि युवापुस्ताको नेतृत्व, सुशासन, पारदर्शिता र जनउत्तरदायी राजनीतिलाई प्राथमिकतामा राख्नुपर्नेमा जोड दिएका थिए। उनीहरूले निराशा र आक्रोशलाई सिर्जनात्मक परिवर्तनमा रूपान्तरण गर्दै देशलाई समृद्धिको दिशातर्फ लैजानुपर्ने बताएका छन्।

देशभरबाट आएका प्रतिनिधि, कार्यकर्ता तथा समर्थकहरूको उल्लेख्य सहभागिता रहेको महाधिवेशनमा आगामी संगठनात्मक कार्यदिशा, नीति तथा नेतृत्व चयनका विषयमा पनि व्यापक छलफल हुने कार्यक्रम रहेको छ।

रास्वपाले आफ्नो प्रथम महाधिवेशनलाई केवल संगठनात्मक कार्यक्रम नभई नयाँ राजनीतिक संस्कार र वैकल्पिक राजनीतिक यात्राको सुरुवातका रूपमा प्रस्तुत गरेको छ। महाधिवेशनमा नेताहरूका सम्बोधनले पार्टीलाई आन्दोलनको चरणबाट संस्थागत र परिणाममुखी राजनीतिक शक्तिका रूपमा स्थापित गर्ने सन्देश दिएको सहभागीहरूको भनाइ छ।