सञ्जय मिश्रा/रौतहट,/६ असार । रौतहट जिल्लामा सञ्चालन भइरहेको ‘ट्राफिक जनचेतनामूलक सप्ताह–२०८३’ अन्तर्गत विभिन्न सचेतनामूलक कार्यक्रमलाई तीव्रता दिइएको छ ।
सप्ताहअन्तर्गत तेस्रो दिन सवारी साधनहरूको मेकानिकल चेकजाँच, सिट क्षमता तथा आरक्षण सिट कार्यान्वयनको अनुगमन, सार्वजनिक बसको भाडादर निरीक्षण तथा जनचेतनामूलक सामग्री वितरण गरिएको छ ।
मधेश प्रदेश प्रहरी कार्यालय जनकपुरधाम, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया, जिल्ला प्रहरी कार्यालय रौतहट तथा जिल्ला ट्राफिक प्रहरी कार्यालय चन्द्रनिगाहपुरको समन्वयमा सञ्चालन भइरहेको कार्यक्रमलाई मधेश प्रदेश सरकारको गृह, सञ्चार तथा कानुन मन्त्रालयले सहयोग गरिरहेको छ ।
सप्ताहअन्तर्गत ट्राफिक प्रहरीले सवारी साधनहरूमा जनचेतनामूलक स्टिकर टाँस्नुका साथै बजार तथा सार्वजनिक स्थलहरूमा पर्चा–पम्प्लेट वितरण गरेको छ । मुख्य चोक तथा व्यस्त सडक क्षेत्रमा ट्राफिक सुरक्षा सम्बन्धी जिङ्गल बजाएर सर्वसाधारणलाई ट्राफिक नियमबारे सचेत गराइएको थियो ।
यसअघि दोस्रो दिन यातायात व्यवसायी तथा मजदुरहरूसँग सडक दुर्घटना न्यूनीकरणका उपायबारे अन्तरक्रिया कार्यक्रम आयोजना गरिएको थियो । कार्यक्रममा चालक तथा सहचालकलाई ट्राफिक नियमको पालना, सुरक्षित सवारी सञ्चालन र दुर्घटनाका प्रमुख कारणबारे जानकारी गराइएको थियो ।
त्यसैगरी जिल्लाका विभिन्न विद्यालय तथा कलेजमा विद्यार्थीलाई लक्षित गरी ट्राफिक सचेतना प्रशिक्षण सञ्चालन गरिएको थियो । प्रशिक्षणका क्रममा जेब्रा क्रसिङको प्रयोग, हेल्मेट तथा सिटबेल्टको महत्व, ट्राफिक संकेतहरूको अर्थ र सुरक्षित सडक प्रयोगसम्बन्धी जानकारी प्रदान गरिएको प्रहरीले जनाएको छ ।
प्रहरीका अनुसार सप्ताहभर विभिन्न सचेतनामूलक कार्यक्रम सञ्चालन गरी ट्राफिक नियम पालनाको संस्कार विकास गर्ने, सडक अनुशासन कायम गर्ने तथा सडक दुर्घटना न्यूनीकरण गर्ने लक्ष्य राखिएको छ ।
जिल्ला ट्राफिक प्रहरी कार्यालय रौतहटका प्रमुख इन्स्पेक्टर राजेन्द्र थापा मगर ले सडक सुरक्षा केवल प्रहरीको मात्र जिम्मेवारी नभई सबै नागरिकको साझा दायित्व भएको उल्लेख गर्दै ट्राफिक नियमको पूर्ण पालना गर्न आग्रह गरेका छन्। उनका अनुसार सप्ताहअन्तर्गत आगामी दिनहरूमा पनि जिल्लाका विभिन्न स्थानमा जनचेतनामूलक कार्यक्रमहरू निरन्तर सञ्चालन गरिनेछ ।
Discussion about this post