गिरिजानन्द साह/धनुषा/जेठ २७ गते । दिव्य विकास स्रोत केन्द्र (DDRC) को आयोजनामा विद्यालयसँग सम्बन्धित लैङ्गिक हिंसाका सवाल, गुनासो सुनवाई संयन्त्र सुदृढीकरण तथा विद्यालय, सामुदायिक प्रहरी साझेदारी र लैङ्गिक सेवा प्रदायकहरूबीच अन्तरक्रियात्मक संवाद कार्यक्रम जनकपुरधाम–१७ स्थित श्री सरस्वती माध्यमिक विद्यालयमा सम्पन्न भएको छ।
बेलायत सरकारको आर्थिक सहयोग तथा पिपुल इन नीड नेपालको साझेदारीमा सञ्चालन भइरहेको “सुरक्षा तथा न्याय कार्यक्रम (Security and Justice Programme–SJP)” अन्तर्गत कार्यक्रम आयोजना गरिएको हो। विद्यालयमा हुने लैङ्गिक हिंसाको रोकथाम, प्रतिकार्य तथा पीडितमैत्री गुनासो व्यवस्थापन प्रणालीलाई प्रभावकारी बनाउने उद्देश्यले कार्यक्रम सञ्चालन गरिएको आयोजकले जनाएको छ।
कार्यक्रमका अध्यक्षता गरेका जनकपुरधाम उपमहानगरपालिका वडा नम्बर–१७ का वडा अध्यक्ष रामवृक्ष यादव ले विद्यालयलाई सुरक्षित, समावेशी र हिंसामुक्त वातावरण बनाउन सबै पक्षको साझा दायित्व रहेको बताए। उनले विद्यार्थीहरूले निर्धक्क रूपमा आफ्ना समस्या र गुनासो राख्न सक्ने वातावरण निर्माण गर्नुपर्नेमा जोड दिए।
DDRC का संयोजक जागेश्वर यादव ले विद्यालयस्तरमा हुने धेरैजसो लैङ्गिक हिंसाका घटना सार्वजनिक नहुने भएकाले प्रभावकारी गुनासो सुनवाई संयन्त्रको आवश्यकता रहेको बताए। उनले हिंसाविरुद्ध सचेतना अभिवृद्धि र समन्वयात्मक प्रयासमार्फत विद्यालयलाई अझ सुरक्षित बनाउन सकिने धारणा राखे।
कार्यक्रममा जिल्ला प्रहरी कार्यालय धनुषाका वरिष्ठ सई टेकबहादुर कार्की ले लागुऔषध दुव्र्यसन, त्यसबाट हुने सामाजिक असर तथा समुदाय–प्रहरी साझेदारी कार्यक्रमबारे विद्यार्थीहरूलाई जानकारी गराएका थिए। उनले किशोर–किशोरीलाई गलत संगत र कुलतबाट टाढा रहँदै अनुशासित जीवनशैली अपनाउन आग्रह गरे।
त्यसैगरी मधेश प्रदेश प्रहरी कार्यालय जनकपुरधामका इन्स्पेक्टर सोनु साह ले साइबर अपराध र साइबर सुरक्षासम्बन्धी प्रस्तुति दिएका थिए। उनले सामाजिक सञ्जालको सुरक्षित प्रयोग, अनलाइन ठगी, फेक आइडी, साइबर बुलिङ तथा व्यक्तिगत गोपनीयताको संरक्षणबारे सहभागीहरूलाई जानकारी गराएका थिए।
कार्यक्रममा पिपुल इन निडका सुनिल साह,दिव्य विकास स्रोत केन्द्र (DDRC) का गणेश ठकुरी, जिल्ला प्रहरी कार्यालय धनुषाका वरिष्ठ सय टेकबहादुर कार्की, मधेस प्रदेश प्रहरी कार्यालय जनकपुरधामका इन्सपेक्टर सोनु साह, माइती नेपाल धनुषाका पुरुषोत्तम यादव,दिव्य विकास स्रोत केन्द्र (DDRC) का कर्मचारीहरु, अभिभावक, शिक्षक–शिक्षिका, सञ्चारकर्मी, संघसंस्थाका प्रतिनिधि तथा विद्यार्थीहरूको उल्लेख्य सहभागिता रहेको थियो।
कार्यक्रममा सहभागीहरूले विद्यालयस्तरमै सचेतना, समन्वय र प्रभावकारी गुनासो व्यवस्थापन प्रणाली विकास गर्न सके लैङ्गिक हिंसा न्यूनीकरणमा महत्वपूर्ण योगदान पुग्ने विश्वास व्यक्त गरेका थिए।
Discussion about this post