धनुषा/वैशाख १ गते । नयाँ वर्ष २०८३को अवसर पारेर ‘स्वच्छ वातावरण, समृद्ध समाज – हाम्रो साझा संकल्प’ भन्ने नारासहित बृहत् सरसफाई तथा वृक्षारोपण कार्यक्रम सम्पन्न भएको छ ।
वैष्णवी बचत तथा ऋण सहकारी संस्था लिमिटेडको आयोजनामा धनुषाको विदेह नगरपालिकास्थित तिनकौरियामा नयाँ वर्षको सुरुवातलाई सकारात्मक कार्यसँग जोड्दै समुदायमा स्वच्छता र हरियाली प्रवर्द्धन गर्ने उद्देश्यले कार्यक्रम आयोजना गरिएको हो । कार्यक्रममा सहभागीहरूले आफ्नो आसपासका क्षेत्रहरू सरसफाई गर्दै वातावरण संरक्षणप्रति जनचेतना फैलाउने काम गरेका थिए ।
कार्यक्रमका क्रममा वृक्षारोपण अभियान पनि सञ्चालन गरिएको थियो । विभिन्न स्थानमा बिरुवा रोपेर हरियाली विस्तार गर्ने प्रयास गरिएको संस्थाका अध्यक्ष रामअशिष मण्डलले जानकारी दिए । उनले बिरुवाको संरक्षणका लागि ट्री गार्ड समेत प्रयोग गरिएको बताए ।
सहकारीलाई केवल आर्थिक कारोबारमा सीमित नराखी सामाजिक तथा वातावरणीय सुधारमा समेत सक्रिय बनाउने उद्देश्यका साथ कार्यक्रम आयोजना गरिएको प्रमुख कार्यकारी अधिकृत जयनाथ मण्डलले बताए ।
कार्यक्रममा विदेह नगरपालिकाका नगरप्रमुख बेचन दास प्रमुख अतिथिको रूपमा सहभागी भएका थिए । साथै स्थानीयवासी, सहकारीका सदस्य तथा विभिन्न सरोकारवालाहरूको उल्लेखनीय उपस्थिति रहेको थियो ।
Discussion about this post