धनुषा/गिरिजानन्द साह/चैत १५ गते। जनकपुरधाममा जारी वडा स्तरीय क्रिकेट प्रतियोगिता अन्तर्गत आज सम्पन्न खेलमा वडा नं. ९ ले वडा नं. ४ लाई ४ विकेटले पराजित गर्दै उत्कृष्ट प्रदर्शन गरेको छ। यस हारसँगै वडा नं. ४ प्रतियोगिताबाट बाहिरिएको छ भने वडा नं. ९ ले आफ्नो यात्रा अगाडि बढाएको छ।
दुवै टोलीबीच भएको प्रतिस्पर्धात्मक खेलमा दर्शकहरूले निकै रोमाञ्चक क्रिकेटको आनन्द लिएका थिए। खेलमा टस वडा नं. ४ ले जित्दै पहिले ब्याटिङ गर्ने निर्णय गरेको थियो। त्यसपछि ब्याटिङका लागि मैदान उत्रिएको वडा नं. ४ ले सुरुवात राम्रो गरे पनि अन्तिमतिर लय कायम राख्न नसक्दा अपेक्षाकृत मध्यम स्कोरमै सीमित रह्यो। खेलमा वडा न.- ४ ले खेलमा जम्मा ९४ रन मात्र बनाउनु सफल भएको थियो। टोलीका प्रमुख ब्याट्सम्यान प्रशान्त ठाकुरले ५३ रन (४२ बल) को शानदार अर्धशतकीय पारी खेले भने अशोक झाले २० रन (२७ बल) योगदान दिए।
वडा नं. ९ का बलरहरूले अनुशासित प्रदर्शन गर्दै विपक्षी टोलीलाई ठूलो स्कोर बनाउन दिएनन्। बलिङतर्फ रवि शर्माले उत्कृष्ट प्रदर्शन गर्दै ४ विकेट लिएका थिए भने अरविन्द रायले पनि २ विकेट आफ्नो नाममा दर्ज गराए। उनीहरूको उत्कृष्ट बलिङले खेल वडा नं. ९ को पक्षमा मोडिएको थियो।
९५ रनको मध्यम लक्ष्य पछ्याउन मैदान उत्रिएको वडा नं. ९ ले सुरुवात केही दबाबमा खेले पनि मध्यक्रमका ब्याट्सम्यानहरूले जिम्मेवारीपूर्वक खेल्दै टोलीलाई जिततर्फ अग्रसर गराए। वडा न.-९ ले ६ विकेट गुमाउँदै ९५ रन बनाउन सफल भयो। खेलमा अरविन्द रायले २७ रन (२८ बल) को महत्वपूर्ण पारी खेले भने जयमन्दारले २६ रन (३६ बल) जोड्दै टोलीको जित सुनिश्चित गरे। अन्य ब्याट्सम्यानहरूले पनि सानो–सानो योगदान दिँदै लक्ष्य पूरा गर्न सहयोग पुर्याए।
यता वडा नं. ४ का बलरहरूले पनि राम्रो संघर्ष गरेका थिए। आशिषले ४ विकेट लिँदै उत्कृष्ट बलिङ गरे भने शिवमले २ विकेट हात पारे। तर, उनीहरूको प्रयास टोलीलाई जित दिलाउन पर्याप्त हुन सकेन।
खेलको समग्र प्रदर्शनका आधारमा वडा नं. ९ का अरविन्द रायलाई “म्यान अफ द म्याच” घोषित गरिएको थियो। उनले ब्याटिङ र बलिङ दुवैतर्फ उत्कृष्ट योगदान दिएका थिए। उक्त पुरस्कार अफिसियल अम्पायर प्रकाश घिमिरेद्वारा प्रदान गरिएको थियो। यस जितसँगै वडा नं. ९ प्रतियोगितामा थप आत्मविश्वासका साथ अगाडि बढेको छ भने वडा नं. ४ प्रतियोगिताबाट बाहिरिएको छ।
प्रतियोगितामा जम्मा १८ वटा वडाको टीम ले भाग लिएका छन् । यस वडा कपको डाइरेक्टर हरी शंकर साह,एड्मिनिस्ट्रेटर अम्भु प्रसाद साह, डेन्टल पार्टनर र को स्पोनसर गिता आस्पीरेशन प्रा.लि.देवी चोक,मेडिकल पार्टनर ओम फिजियो थेरापी,टाईटल स्पोन्सर युरो पेन्टस,मिडिया कोर्डिनेटर सजिलो पोस्ट,स्पोर्ट्स पार्ट्नर हरीस स्पोर्ट्स जोन,स्पोर्टिङ्ग क्लब श्री राजदेवी युवा कमिटी र न्यु भिजन नेपाल रहेको छ। वडा कपको संयोजक अरविन्दका अनुसार प्रतियोगिता नकआउट प्रणालीमा खेलाइदै छ भने खेलमा सेतो लेदर बल बाट भईरहेको छ । खेलका सम्पूर्ण नियमहरू अन्तर्राष्ट्रिय क्रिकेट परिषद् (ICC) का प्रचलित मापदण्डअनुसार रहेको जानकारी संयोजक प्रशान्त अरविन्दले दिएको छ।
Discussion about this post