यूरो पेन्टस वडा कप २०८२ अन्तर्गतको खेलमा वडा नं. १९ को शानदार जित, वडा नं. १ भयो ३७ रनले पराजित

धनुषा/चैत १४ गते। जनकपुरधाममा जारी यूरो पेन्ट्स वडा स्तरीय क्रिकेट प्रतियोगिता अन्तर्गत सम्पन्न खेलमा वडा नं. १९ ले वडा नं. १ लाई ३७ रनले पराजित गर्दै उत्कृष्ट प्रदर्शन गरेको छ।

टस जितेर पहिले ब्याटिङ गरेको वडा नं. १९ ले निर्धारित २० ओभरमा ७ विकेट गुमाउँदै १३७ रनको सम्मानजनक योगफल तयार पारेको थियो। टोलीका लागि जयुमारले उत्कृष्ट अर्धशतकीय पारी खेल्दै ५५ बलमा ६० रन बनाए। उनले ८ चौका प्रहार गर्दै टोलीलाई मजबुत स्थितिमा पुर्‍याए। नबिनले २९ रनको योगदान दिए भने अन्य खेलाडीहरूले सानो–सानो योगदान गरे। अतिरिक्त रूपमा ३४ रन प्राप्त हुनु पनि टोलीका लागि महत्वपूर्ण रह्यो।

वडा नं. १ का लागि सामिनले २ विकेट लिए भने नेटिक, समीर दर्जी, नाबेद र साहिलले समान १–१ विकेट लिए। १३८ रनको लक्ष्य पछ्याएको वडा नं. १ को ब्याटिङ कमजोर रह्यो। पूरै टोली १९.३ ओभरमा १०० रनमै समेटियो। टोलीका लागि राकेशले सर्वाधिक ४४ रन बनाए भने सामिनले २१ रनको योगदान दिए। अन्य ब्याट्सम्यानहरू ठूलो स्कोर बनाउन असफल रहे।

वडा नं. १९ का बलरहरूले उत्कृष्ट प्रदर्शन गरे। महेशले ४ विकेट लिएर विपक्षी टोलीलाई दबाबमा राखे भने पप्पुले २ विकेट र जयुमारले पनि २ विकेट लिए। अनिलले १ विकेट हात पारे।

समग्रमा ब्याटिङ र बलिङ दुवै पक्षमा सन्तुलित प्रदर्शन गर्दै वडा नं. १९ ले प्रभावशाली जीत हासिल गरेको हो। यस जीतसँगै वडा नं. १९ प्रतियोगितामा थप मजबुत बनेको छ। म्यान अफ द म्याच वडा न.-१९ का जय कुमार भएका छ्न ।

प्रतियोगितामा जम्मा १८ वटा वडाको टीम ले भाग लिएका छन् । यस वडा कपको डाइरेक्टर हरी शंकर साह,एड्मिनिस्ट्रेटर अम्भु प्रसाद साह, डेन्टल पार्टनर र को स्पोनसर गिता आस्पीरेशन प्रा.लि.देवी चोक,मेडिकल पार्टनर ओम फिजियो थेरापी,टाईटल स्पोन्सर युरो पेन्टस,मिडिया कोर्डिनेटर सजिलो पोस्ट,स्पोर्ट्स पार्ट्नर हरीस स्पोर्ट्स जोन,स्पोर्टिङ्ग क्लब श्री राजदेवी युवा कमिटी र न्यु भिजन नेपाल रहेको छ। प्रतियोगिता नकआउट प्रणालीमा खेलाइदै छ भने खेलमा सेतो लेदर बल बाट भईरहेको छ । खेलका सम्पूर्ण नियमहरू अन्तर्राष्ट्रिय क्रिकेट परिषद् (ICC) का प्रचलित मापदण्डअनुसार रहेको जानकारी संयोजक प्रशान्त अरविन्दले दिएको छ।