धनुषा ट्राफिक प्रहरी प्रमुख सुर्य बहादुर शाहीको सक्रियतामा व्यवस्थित हुँदै जनकपुरधाम

धनुषा/चैत ३ गते । धनुषामा ट्राफिक व्यवस्थापनलाई आधुनिक र प्रविधिमैत्री बनाउने उद्देश्यसहित ट्राफिक प्रहरी प्रमुख सुर्य बहादुर शाही योजनाबद्ध रूपमा अघि बढिरहेका छन्। उनले जिम्मेवारी सम्हालेयता जिल्लामा ट्राफिक व्यवस्थापनमा उल्लेखनीय सुधार देखिन थालेको छ।

जिल्ला ट्राफिक प्रहरी कार्यालयको गेटमा डिजिटल डिस्प्ले बोर्ड जडान गरिएको छ भने जनकपुरधामका विभिन्न चोकहरूमा ४३ वटा CCTV क्यामेरा जडान गरिसकिएको छ। यसले ट्राफिक निगरानी तथा व्यवस्थापनलाई थप प्रभावकारी बनाएको छ।

हालै जनकपुरधामको रामानन्द चोकदेखि जनक चोकसम्म वन-वे प्रणाली लागू गरिएको छ। सर्वपक्षीय सहमतिमा गरिएको यस निर्णयको कार्यान्वयनपछि ट्राफिक जाममा कमी आएको छ भने स्थानीय बासिन्दा समेत खुशी देखिएका छन्। विशेषगरी अस्पताल रोड क्षेत्रमा वर्षौंदेखि हुँदै आएको जामको समस्या समाधान भएको बताइएको छ।

त्यसैगरी बाब पेट्रोल पम्प पुल नजिक दुर्घटना बढी हुने क्षेत्रलाई ‘ब्ल्याक स्पट’को रूपमा पहिचान गरी त्यहाँ रम्बल स्ट्रिप, जेब्रा क्रसिङ र वाल बेरियर निर्माण गरिएको छ। साथै, नेपाल विद्युत प्राधिकरणसँग समन्वय गरी दुर्घटनाको कारण बनेको बिजुलीको पोल हटाइएको छ। यी सुधारपछि उक्त क्षेत्रमा हाल दुर्घटना शून्यमा झरेको जनाइएको छ।

प्रहरी निरीक्षक शाहीकै योजनाअनुसार जनकपुरधामको रामानन्द चोकलाई नमुना चोक बनाउने कार्य सुरु गरिएको छ। सडक विभागसँग समन्वय गरी काठमाडौं उपत्यका बाहिर पहिलो पटक मधेश प्रदेशको राजधानी जनकपुरधाममा फ्लेक्जिबल स्प्रिङ पोस्ट जडान गरिएको छ।

यस योजना कार्यान्वयन अघि सर्वपक्षीय बैठक आयोजना गरी सरोकारवालाहरूको समर्थन समेत लिइएको ट्राफिक प्रहरीले जनाएको छ। आगामी दिनमा अन्य स्थानहरूमा पनि यस्ता सुधार कार्यलाई विस्तार गर्दै जाने योजना रहेको प्रहरी निरीक्षक शाहीले बताएका छन्।

समग्रमा, प्रविधि र योजनाबद्ध पहलमार्फत धनुषामा ट्राफिक व्यवस्थापनलाई व्यवस्थित, सुरक्षित र आधुनिक बनाउने प्रयास प्रभावकारी बन्दै गएको देखिन्छ।