धनुषा–३ मा पुनः मतदाताले अवसर दिनेमा जुलीकुमारी महतो विश्वस्त

धनुषा/फागुन १० गते । नेकपा (एमाले)बाट धनुषा निर्वाचन क्षेत्र नम्बर ३ मा उम्मेदवारी दिएकी जुलीकुमारी महतोले यस क्षेत्रका मतदाताले पुनः आफूलाई विश्वास गर्ने दाबी गरेकी छन्। उनले २०७९ सालको निर्वाचनमा मतदाताले देखाएको भरोसा यस पटक पनि कायम रहने विश्वास व्यक्त गरिन्।

आइतबार जनकपुरधाम उपमहानगरपालिका–१६, कपिलेश्वर पुगेकी उम्मेदवार महतोलाई स्थानीयवासीले स्वागत गरेका थिए। सो अवसरमा उनले भनिन्, “पछिल्लो निर्वाचनमा यहाँका मतदाताले काम गर्ने अवसर दिनुभएको थियो। सोही अनुसार विकासका काम अघि बढेका थिए, तर कार्यकाल पूरा नहुँदै फेरि निर्वाचनमा जानुपरेको छ।” सुरु गरिएका अधुरा योजनाहरू आफूले नै पूरा गर्नेमा मतदाता विश्वस्त रहेको उनले बताइन्।

उम्मेदवार महतोले क्षेत्रको समग्र विकासका लागि ल्याइएका योजनाहरू कार्यकाल समाप्त हुनुअघि नै अवरुद्ध भएको उल्लेख गर्दै मतदाताले निरन्तरताका लागि पुनः अवसर दिने विश्वास व्यक्त गरिन्।
उनले बिना नीति र स्पष्ट भिजनका नयाँ दलहरूले पुराना दलप्रति मतदातामा वितृष्णा फैलाउने प्रयास गरिरहेको आरोप पनि लगाइन्। एमाले संविधानको रक्षा र राष्ट्रिय स्वाधीनताको पक्षमा निरन्तर उभिँदै आएको दल भएको कुरा मतदातालाई राम्रोसँग जानकारी रहेको उनको भनाइ थियो।

एमाले नेतृत्वको सरकारले विकास र समृद्धिको स्पष्ट मार्गचित्र अघि सारेको दाबी गर्दै महतोले मधेसको विकासमा भएका पहलहरू स्मरण गरिन्। उनले नेपाल कम्युनिष्ट पार्टी (एमाले) नेतृत्वको सरकारले नेपाल रेल्वे कम्पनी लिमिटेड को स्तरोन्नति, सुनकोशी–मरिन–कमला डाइभर्सन योजना अघि बढाउने तथा जनकपुरधाम लाई वैवाहिक गन्तव्यका रूपमा विकास गर्ने योजना अघि सारेको उल्लेख गरिन्। मतदाता यी उपलब्धिहरूबारे जानकार रहेकाले पुनः एमाले नेतृत्वकै सरकार देख्न चाहिरहेको उनले दाबी गरिन्।