जनकपुरधाममा भोलि बुधबार कांग्रेसले घोषणापत्र सार्वजनिक गर्ने

धनुषा/फागुन ५ गते । नेपाली कांग्रेसले फागुन २१ गतेको प्रतिनिधिसभा निर्वाचनलाई लक्षित गर्दै आफ्नो चुनावी घोषणापत्र जनकपुरधामबाट भोलि सार्वजनिक गर्न लागेको छ । कांग्रेसले मधेश केन्द्रित औपचारिक शक्ति प्रदर्शनका रूपमा भव्य सभाको आयोजना गर्दै घोषणापत्र सार्वजनिक गर्न लागेको हो ।

जनकपुरधामस्थित तिरुहुतिया गाछीमा बुधबार आयोजना हुने उक्त सभाको तयारी अन्तिम चरणमा पुगेको जानकारी मधेश प्रदेश सभापति तथा प्रदेशका मुख्यमन्त्री कृष्णप्रसाद यादवले मंगलबार पत्रकार सम्मेलनमार्फत दिएका हुन् ।

उनका अनुसार मधेशका आठवटै जिल्लाबाट नेता–कार्यकर्तालाई सक्रिय रूपमा परिचालन गरिएको छ । कम्तीमा एक लाख जनसहभागिता सुनिश्चित गर्ने लक्ष्यसहित कार्यक्रमको व्यवस्थापन मिलाइएको उनले बताए । ‘यो सभा मात्र होइन, आगामी निर्वाचनका लागि संगठन सुदृढीकरणको अभ्यास पनि हो,’ यादवको भनाइ थियो ।

सभामा पार्टीका केन्द्रीय सभापति गगन थापा सहित शीर्ष नेतृत्वको उपस्थिति रहने जनाइएको छ । केन्द्रीय नेतृत्वको सहभागिताले मधेशमा कांग्रेसको चुनावी अभियानलाई थप गति दिने अपेक्षा गरिएको छ ।
सार्वजनिक गरिने घोषणापत्रमा मधेशको समग्र आर्थिक–सामाजिक रूपान्तरणलाई प्राथमिकतामा राखिएको पार्टीको दाबी छ । रोजगारी सिर्जना, कृषि आधुनिकीकरण, सिंचाइ तथा भण्डारण पूर्वाधार विस्तार, शिक्षा–स्वास्थ्य सेवाको गुणस्तर सुधार, सडक तथा अन्य संरचना निर्माण, लगानीमैत्री वातावरण र सुशासन जस्ता विषयलाई मुख्य एजेन्डा बनाइएको बताइएको छ ।

यादवले मधेशमा बढ्दो बेरोजगारी, कृषि उत्पादनको स्थिर अवस्था र आधारभूत सेवाको कमजोर प्रवाहलाई सम्बोधन गर्ने गरी नीति तथा कार्यक्रम तयार गरिएको स्पष्ट पारे । उनका अनुसार मधेशको आर्थिक रूपान्तरणबिना राष्ट्रिय समृद्धि सम्भव नहुने दृष्टिकोणले घोषणापत्र तयार पारिएको हो ।

यसैबीच, नेपाली कांग्रेसले बुधबार मधेस प्रदेशको धनुषाबाट आफ्नो चुनावी घोषणापत्र सार्वजनिक गर्ने जनाएको छ। ‘भिजन १०’ को थिममा आधारित घोषणापत्रलाई यसपटक ‘प्रतिज्ञापत्र’ नाम दिइएको यादवले जानकारी दिए। उनले धनुषामा आयोजना हुने विशेष सभामा सहभागी भई शीर्ष नेताहरूको सम्बोधन सुन्न र मुलुक निर्माणको जिम्मेवारी बोध गर्न सबै नागरिकलाई अपिल गरेका छन्।

सभा स्थल आसपास सुरक्षा व्यवस्था कडा पारिएको छ । बाहिरी जिल्लाबाट आउने सहभागीका लागि यातायात तथा अन्य व्यवस्थापनसम्बन्धी तयारी पनि सम्पन्न भइसकेको आयोजकले जनाएको छ ।
निर्वाचनअघि कांग्रेसले यस कार्यक्रमलाई जनमत निर्माणको निर्णायक अवसरका रूपमा लिएको छ । मधेश केन्द्रित एजेन्डाले मतदातामाझ कस्तो प्रभाव पार्छ भन्ने विषय अब आगामी निर्वाचन परिणामले नै तय गर्नेछ ।