भ्रष्टाचार नियन्त्रणका लागि नैतिकता र सदाचार आवश्यक : प्रदेश प्रमुख डा. कर्ण

धनुषा/माघ २८ गते। मधेश प्रदेशका प्रदेश प्रमुख प्राध्यापक डा. सुरेन्द्र लाभ कर्णले भ्रष्टाचार नियन्त्रणका लागि व्यक्तिमा नैतिकता तथा सदाचारको विकास अपरिहार्य रहेको बताएका छन्।

अख्तियार दुरुपयोग अनुसन्धान आयोगको ३५औँ वार्षिकोत्सवको अवसरमा आयोगको बर्दिबासस्थित कार्यालयद्वारा जनकपुरधाममा आयोजित विशेष समारोहलाई सम्बोधन गर्दै उनले अख्तियारको दुरुपयोग रोक्न आयोगले खेलेको भूमिकाको सराहना गरे। मुलुकमा सुशासन र समृद्धि हासिल गर्न भ्रष्टाचार नियन्त्रण अत्यावश्यक भएको उनको भनाइ थियो।

कार्यक्रममा मधेश प्रदेशका मुख्यमन्त्री कृष्ण प्रसाद यादवले प्रदेश सरकारले सुशासनमार्फत समृद्धि र विकासको पक्षमा काम गर्न चाहँदा पनि आयोगबाट साना–साना विषयमा हुने पत्राचारका कारण कर्मचारीहरू काम गर्न डराउने अवस्था सिर्जना भएको बताए। उनले आवश्यक समन्वय र स्पष्ट कार्यदिशा भएमा सेवा प्रवाह अझ प्रभावकारी बन्ने धारणा राखे।

सभामुख रामआशिष यादवले अख्तियारप्रतिको जनविश्वास बढ्यो वा घट्यो भन्ने विषयको मूल्याङ्कन स्थापना दिवसका अवसरमा गर्दै त्यसैअनुसार नीति निर्माण गर्नुपर्नेमा जोड दिए। उच्च अदालत जनकपुरधामका मुख्य न्यायाधीश टेक नारायण कुँवरले मधेश प्रदेशमा शिक्षा, स्वास्थ्य तथा स्थानीय तहसम्बन्धी धेरै मुद्दा विशेष अदालतमा पर्ने गरेको अनुभव सुनाउँदै यसमा सुधार आवश्यक रहेको बताए।

मधेश प्रदेशका प्रमुख सचिव कमल प्रसाद भट्टराईले सुशासनका लागि कर्मचारी व्यवस्थापन, सेवा प्रवाह र सार्वजनिक खरिद प्रक्रियामा विशेष ध्यान दिन आग्रह गरे। कार्यक्रममा जिल्ला समन्वय समिति धनुषाका प्रमुख राजनन्दन मण्डल, जनकपुरधाम उपमहानगरपालिकाका प्रमुख मनोज कुमार साह, धनुषाका प्रमुख जिल्ला अधिकारी प्रेम प्रसाद लुइँटेल, अख्तियारको बर्दिबासस्थित कार्यालयका प्रमुख राम बहादुर कुरुवाङ्ग तथा उप–सचिव प्रकाश पोखरेललगायतले पनि धारणा व्यक्त गरेका थिए।

सोही अवसरमा प्रदेश प्रमुख डा. कर्णले आयोगको बर्दिबास कार्यालयका नायव सुब्बा सुरेश कुमार बराल, शाखा अधिकृत अरुण कुमार बराल तथा प्रहरी निरीक्षक सञ्जीव सुवाललाई ‘अख्तियार सेवा पुरस्कार’ प्रदान गरे। कार्यक्रममा आयोगको बर्दिबास कार्यालयमा गत वर्ष परेका २ हजार ५ सय २५ उजुरीमध्ये १ हजार ७ सय १३ उजुरी फर्छ्यौट हुन बाँकी रहेको जानकारी गराइएको थियो।