धनुषा/ माघ २६ गते। नक्सा स्वीकृत नगरी निर्माण गरिएका तथा स्वीकृत नक्सामा हेरफेर गरी बनाइएका घर–भवनलाई नियमित तथा अभिलेखीकरण गर्ने प्रक्रिया जनकपुरधाम उपमहानगरपालिकाले सुरु गरेको छ।
उपमहानगरपालिकाले सूचना जारी गर्दै माघ २५ गतेदेखि वैशाख २५ गतेसम्म तीन महिनाको समयावधिभित्र आवश्यक कागजातसहित निवेदन दिन सम्बन्धित भवनधनीलाई आग्रह गरेको छ। तोकिएको अवधिभित्र निवेदन नदिने भवनधनीको हकमा कुनै प्रक्रिया अघि नबढाइने स्पष्ट गरिएको छ।
गत असार ३० गते सम्पन्न उपमहानगरपालिकाको १३ औँ नगरसभाको निर्णयअनुसार यो अभियान सुरु गरिएको हो। उपमहानगरपालिकाभित्र प्रचलित कानुनबमोजिम नक्सा पास नगरी निर्माण गरिएका वा स्वीकृत नक्सामा परिवर्तन गरी बनाइएका संरचनालाई कानुनी दायरामा ल्याउने उद्देश्यले प्रक्रिया अघि बढाइएको जनाइएको छ।
सूचनाअनुसार भवन नियमित गर्न जग्गाधनी प्रमाणपूर्जा, घरजग्गा कर तिरेको रसिद, नागरिकता, नापी नक्सा, इन्जिनियरको प्रमाणपत्र, साइट प्लान, घरको फोटो, फुटप्रिन्टलगायत कागजात अनिवार्य रूपमा पेश गर्नुपर्नेछ। बाटो स्पष्ट नभएको अवस्थामा सम्बन्धित वडा कार्यालयको सिफारिस समेत आवश्यक पर्नेछ।
यस्तै, संस्थागत भवनको हकमा उद्योग तथा कम्पनी दर्ता प्रमाणपत्र, प्रबन्धपत्र, संस्थाको निर्णयलगायत थप कागजात पनि बुझाउनुपर्ने व्यवस्था गरिएको छ।
उपमहानगरपालिकाले तोकिएको समयसीमा नाघेर आएका निवेदनमाथि कुनै कारबाही तथा प्रक्रिया अघि नबढाइने जनाएको छ। यससम्बन्धी थप जानकारीका लागि भू–उपयोग तथा भवन निर्माण इजाजत शाखामा सम्पर्क गर्न उपमहानगरपालिकाले आग्रह गरेको छ।
Discussion about this post