गिरिजानन्द साह/धनुषा/माघ २१ गते। महिला पतंजली योग साधना केन्द्र जनकपुरधामको १४औँ वार्षिकोत्सव जनकपुरधाममा भव्य रूपमा सम्पन्न भएको छ। योग, स्वास्थ्य र आत्म अनुशासनको सन्देश फैलाउने उद्देश्यका साथ आयोजित वार्षिकोत्सव कार्यक्रममा महिला साधिकाहरूको उल्लेख्य उपस्थिति रहेको थियो।
कार्यक्रमको अध्यक्षता महिला पतंजली योग साधना केन्द्रकी अध्यक्ष मन्जिता सहनीले गरेकी थिइन् भने प्रमुख अतिथिका रूपमा जिल्ला अध्यक्ष प्रमिला महासेठ सहभागी भएकी थिइन्।
वार्षिकोत्सव कार्यक्रममा विजेता झा, बिमल पण्डित, रञ्जना झा, संगीता मण्डल, सिमा मण्डल, केशर मण्डल, प्रमिला साह, कोषाध्यक्ष अनिता पाण्डे, महामन्त्री सुनिता मण्डललगायत महिला पतंजली योगपिठ धनुषाका सम्पूर्ण सदस्यहरूको उपस्थिति रहेको थियो।
कार्यक्रमलाई सम्बोधन गर्दै अध्यक्ष मन्जिता सहनीले योगले महिलाको शारीरिक, मानसिक र आत्मिक विकासमा महत्वपूर्ण भूमिका खेल्ने बताइन्। उनले भनिन्, “महिला पतंजली योग साधना केन्द्र महिलाहरूलाई स्वस्थ, आत्मनिर्भर र अनुशासित बनाउने अभियानमा निरन्तर अघि बढिरहेको छ। आगामी दिनमा योगलाई गाउँ–गाउँसम्म विस्तार गर्ने हाम्रो लक्ष्य छ।”
प्रमुख अतिथि प्रमिला महासेठले महिलाहरूको स्वास्थ्य सुदृढीकरणमा योगको महत्व उल्लेख गर्दै पतंजली योगपिठले समाजमा सकारात्मक परिवर्तन ल्याइरहेको बताइन्। उनले भनिन्, “आजको व्यस्त जीवनशैलीमा योग अपरिहार्य बनेको छ। महिलाहरू स्वस्थ भए मात्र परिवार र समाज स्वस्थ हुन्छ, त्यसका लागि यस्ता संस्थाहरूको भूमिका प्रशंसनीय छ।”
त्यसैगरी विजेता झाले योगले तनाव व्यवस्थापन र जीवनशैली सुधारमा सहयोग पुर्याउने बताउँदै भनिन्,
“योग केवल शारीरिक अभ्यास मात्र होइन, यो अनुशासित र सकारात्मक जीवनशैलीको आधार हो। महिलाहरूले योगलाई दैनिक जीवनको हिस्सा बनाउनु आवश्यक छ।”
कार्यक्रममा जानकारी गराइएअनुसार महिला पतंजली योगपिठ धनुषाअन्तर्गत हाल ११ वटा साधना केन्द्र सञ्चालनमा रहेका छन् भने करिब २५० जना महिला सदस्यहरू सक्रिय रूपमा योग साधनामा संलग्न छन्।
महिला पतंजली धनुषाको अध्यक्ष प्रमिला महासेठको अनुसार लगातार १४ वर्ष देखि महिलाहरूको योग गराउदै आइरहेको छ । धनुषामा ११ वटा महिला योग शिविर सञ्चालन गरिएको छ भने १०० भन्दा बढि योग शिविर बनाईएको छ। शिविर बनाउने क्रममा नगर अध्यक्ष मन्जीता सहनीको सहयोग रहेको छ भने संगीता ठाकुर,सिमा साह,सुनिता मण्डल,प्रेम साह र संगीता मण्डलले साथ दिएका छन्।
वार्षिकोत्सव कार्यक्रम आपसी सद्भाव, योग अभ्यास प्रदर्शन तथा प्रेरणादायी मन्तव्यका साथ सम्पन्न भएको थियो।
Discussion about this post