जनकपुरधाम/माघ ११ गते। सुरक्षा र न्यायको पहुँच सुदृढ गर्ने उद्देश्यसहित स्थानीय तहमा लैंगिक हिंसा सम्बन्धी सम्प्रेषण तथा समन्वय ढाँचाको कार्यान्वयनबारे समिक्षात्मक दुईदिने कार्यशाला जनकपुरधाममा सम्पन्न भएको छ।
लैगिंक हिंसा न्यूनिकरण तथा प्रतिकार्यका लागि जनकपुरधाम उपमहानगरपालिकाले रणनीतिक योजनाहरु वनाउन थालेका छन् । समाजमा भइरहेको हानिकारक परम्परागत अभ्यासलाई न्यूनिकरणका लागि सरोकारवालासंगको छलफललाई तिव्रता दिएका छन् । सुरक्षा र न्याय कार्यक्रम अन्तर्गत पालिकाले लैगिंक हिंसा रोकथामका लागि पालिकाले पिपुल इन नीड र दिव्य विकास श्रोत केन्द्रको साझेदारीमा समुदाय स्तर र पालिका स्तरमा गतिविधिहरुलाई तिव्रता दिएका छन् । यसै सन्दर्भमा पालिकाको समन्वयमा दिव्य विकास श्रोत केन्द्रले दुईदिने कार्यशाला सम्पन्न गरेको छ ।
कार्यशाला पिपुल इन निड,DDRC र हामी दाजुभाइको संयुक्त आयोजनामा तथा FCDO को आर्थिक सहयोगमा आयोजना गरिएको हो। कार्यक्रममा स्थानीय तहमा लैंगिक हिंसा सम्बन्धी उजुरी दर्ता, पीडितलाई तत्काल संरक्षण, न्यायिक प्रक्रियामा सहजीकरण तथा सरोकारवाला निकायबीच प्रभावकारी समन्वय कसरी गर्न सकिन्छ भन्ने विषयमा विस्तृत छलफल गरिएको थियो। साथै हालसम्म लागू गरिएको सम्प्रेषण तथा समन्वय ढाँचाको अवस्था, चुनौती र सुधारका सम्भावनाबारे सहभागीहरूले आफ्ना अनुभव र सुझाव प्रस्तुत गरेका थिए।
उपमेयर किशोरी साहले लैंगिक हिंसा अन्त्यका लागि स्थानीय सरकारको भूमिका अझ प्रभावकारी हुनुपर्नेमा जोड दिँदै पीडितमैत्री सेवा प्रवाह, गोपनीयता र शीघ्र न्याय सुनिश्चित गर्नु आजको आवश्यकता भएको बताउनु भयो। उनले समन्वय ढाँचालाई व्यवहारमै लागू गर्न वडा तहदेखि नगर तहसम्म सबै पक्षको सक्रिय सहभागिता आवश्यक रहेको उल्लेख गर्नुभयो ।
कार्यशालाको मुख्य उद्देश्य स्थानीय तहमा लागू गरिएको लैंगिक हिंसा सम्बन्धी सम्प्रेषण तथा समन्वय ढाँचाको प्रभावकारिता मूल्यांकन गर्नुका साथै देखिएका चुनौती, कमजोरी र सुधारका उपायहरू पहिचान गर्नु रहेको थियो। कार्याशालामा पीडितले भोग्नुपर्ने सामाजिक दबाब, ढिलो न्याय, गोपनीयताको अभाव तथा कानुनी प्रक्रियामा देखिने जटिलताबारे पनि गहन छलफल गरिएको थियो।
दोस्रो दिन समन्वय ढाँचाको कार्यान्वयन क्रममा देखिएका व्यवहारिक समस्या, सुधारका सम्भावना तथा आगामी कार्ययोजनामाथि समूहगत छलफल गरिएको थियो। स्थानीय तहमा लैंगिक हिंसा सम्बन्धी सूचना आदान–प्रदानलाई कसरी प्रभावकारी बनाउने, पीडितमैत्री सेवा कसरी विस्तार गर्ने र वडा तहबाटै हिंसा रोकथामका पहल कसरी अघि बढाउने भन्ने विषयमा सहभागीहरूले ठोस सुझाव दिएका थिए।
आयोजक संस्थाहरूले कार्यशालाबाट प्राप्त सुझाव र निष्कर्षका आधारमा आगामी दिनमा स्थानीय तहसँग सहकार्य गर्दै लैंगिक हिंसा न्यूनीकरणका कार्यक्रमहरू अझ प्रभावकारी बनाइने प्रतिबद्धता जनाएका छन्। कार्यशालामा जनकपुरधाम उपमहानगरपालिकाको उपमेयर किशोरी साह, वडा नम्बर–१४ का वडा अध्यक्ष पुण्यप्रताप यादव, वडा नम्बर–४ का वडा अध्यक्ष सुरेश झा, वडा नम्बर–९ का वडा अध्यक्ष परमेश्वर साहसहित विभिन्न संघ–संस्थाका प्रतिनिधि, संचारकर्मी तथा लैंगिक हिंसा न्यूनीकरणसँग सम्बन्धित सरोकारवालाहरूको उल्लेखनीय उपस्थिति रहेको थियो।
Discussion about this post