जनकपुर साहित्य महोत्सव–२०८२ को मिति परिमार्जन चैत्र १२ देखि १४ सम्म आयोजना हुने

जनकपुरधाम/माघ ८ गते। जनकपुर साहित्य महोत्सव–२०८२ को मिति परिवर्तन गरिएको छ। यसअघि माघ २२, २३ र २४ गते महोत्सव आयोजना गर्ने तयारी गरिएको भए पनि सोही अवधिमा नेपाल सरकारले आम निर्वाचनको मिति घोषणा गरेपछि कार्यक्रमको मिति परिमार्जन गरिएको आयोजकले जनाएको छ।

आयोजक संस्था नव मिथिला फाउन्डेशनका अनुसार अब महोत्सव चैत्र १२, १३ र १४ गते जनकपुरधामस्थित राम मन्दिर पार्कमा आयोजना हुनेछ। निर्वाचनको माहोलका कारण देशभर निर्वाचनसम्बन्धी गतिविधि तीव्र हुने र त्यसले लेखक, वक्ता, कलाकार तथा दर्शकको उपस्थितिमा असर पार्न सक्ने सम्भावनालाई मध्यनजर गर्दै मिति सारिएको फाउन्डेशनको भनाइ छ।

पछिल्ला वर्षहरूमा जनकपुर साहित्य महोत्सवले मधेश र मिथिला क्षेत्रको साहित्यिक पहिचानलाई राष्ट्रिय स्तरमा स्थापित गर्न महत्वपूर्ण भूमिका खेलेको आयोजकको दाबी छ। यस वर्ष पनि विविध साहित्यिक सत्र, छलफल तथा सांस्कृतिक प्रस्तुतिमार्फत महोत्सवलाई थप प्रभावकारी बनाउने तयारी गरिएको जनाइएको छ।