संघीयता विरुद्ध गलत भाष्य बनाउने प्रयास भइरहेको छ : अर्थमन्त्री यादव

जनकपुरधाम। मधेस प्रदेशका अर्थमन्त्री महेश यादवले संघीयता रक्षाका लागि मधेसका युवाहरू सक्रिय रूपमा अगाडि आउनुपर्नेमा जोड दिएका छन्। जनकपुरधाम जेसिजको ४३औँ साधारण सभाको उद्घाटन समारोहमा बोल्दै उनले संघीय लोकतान्त्रिक गणतन्त्रात्मक व्यवस्था स्थापना गर्न मधेसी जनताले ठूलो बलिदान दिएको स्मरण गराउँदै उक्त व्यवस्थाको संरक्षण र सुदृढीकरणका लागि युवाहरूको भूमिका निर्णायक हुने बताए।

अर्थमन्त्री यादवले भदौ महिनामा सम्पन्न जेनजी आन्दोलन व्यवस्था परिवर्तनका लागि नभई भ्रष्टाचारविरुद्ध तथा सुशासन स्थापना गर्ने उद्देश्यले भएको स्पष्ट पारे। तर पछिल्लो समय जेनजी आन्दोलनको नाममा संघीयताविरुद्ध गलत भाष्य निर्माण गर्ने प्रयास भइरहेकोप्रति उनले चिन्ता व्यक्त गरे। संघीयता विरोधी तत्वहरू संघीय व्यवस्था समाप्त पार्न सक्रिय रहेकाले त्यस्ता गतिविधिविरुद्ध युवाहरू एकजुट हुन आवश्यक रहेको उनले बताए।

यसैबीच, साधारण सभाबाट वर्ष २०२६ का लागि जनकपुरधाम जेसिजको अध्यक्षमा जेसी भवेश झा चयन भएका छन्। कार्यकारिणी उपाध्यक्षमा जेसी राम सोगारथ साह र जेसी अमरेन्द्र साह चयन भएका छन् भने उपाध्यक्षमा जेसी नवीन कुमार झा, जेसी कैलाश नारायण साह, जेसी विनय कुमार साह र जेसी सुरेश चयन भएका छन्।