जनकपुरधाम/माघ ३ गते । पाँचौँ अन्तरविद्यालय टी–२० क्रिकेट प्रतियोगिताको उपाधि मदर ट्रेसा पब्लिक स्कुलले जितेको छ । शनिबार जनकपुरधामको बाह्रबिघा मैदानमा सम्पन्न फाइनल खेलमा सिद्धार्थ शिशु सदनलाई १६ रनले पराजित गर्दै मदर ट्रेसाले उपाधि हात पारेको हो । यस जितसँगै मदर ट्रेसाले दोस्रो पटक अन्तरविद्यालय टी–२० प्रतियोगिताको उपाधि जित्न सफल भएको छ ।
फाइनल खेलमा टस जितेर पहिला ब्याटिङ गरेको मदर ट्रेसा पब्लिक स्कुलले निर्धारित २० ओभरमा सबै विकेट गुमाउँदै ८८ रन बनाएको थियो । मदर ट्रेसाका लागि सुरज यादवले १६ बलमा २५ रनको महत्वपूर्ण पारी खेले भने आर्दश यादवले २६ बलमा १६ रन जोडे ।
८८ रनको लक्ष्य पछ्याउँदै जवाफी ब्याटिङमा उत्रिएको सिद्धार्थ शिशु सदन ७१ रनमै अलआउट हुन पुग्यो । सिद्धार्थका लागि आयुष यादवले ३० बलमा १६ रन तथा राहुल यादवले १५ बलमा १० रनको योगदान दिए ।
बलिङतर्फ मदर ट्रेसाका रिसन झाले चार ओभरमा सात रन खर्चेर दुई विकेट लिए भने आर्दश यादवले चार ओभरमा ११ रन खर्चेर दुई विकेट हात पारे । सिद्धार्थका लागि आयुष यादवले चार ओभरमा ११ रन खर्चेर चार विकेट लिए भने राहुल यादवले चार ओभरमा २० रन खर्चेर एक विकेट लिए ।
उक्त फाइनल खेलको ‘म्यान अफ द म्याच’ मदर ट्रेसा पब्लिक स्कुलका सुरज यादव घोषित भए । प्रतियोगितामा ‘बेस्ट बलर/फिल्डर’ तथा ‘म्यान अफ द सिरिज’ सिद्धार्थ शिशु सदनका आयुष यादव बने । ‘बेस्ट ब्याटर’ संकटमोचन स्कुलका निखिल मण्डल, ‘इमर्जिङ प्लेयर’ न्यू आइडल स्कुलका अभियान्सु सिंह, ‘बेस्ट विकेटकिपर’ मदर ट्रेसाका विकास विराज तथा ‘फेयर प्ले अवार्ड’ न्यू आइडल स्कुलले प्राप्त गरेका छन् ।
जनकपुर स्पोर्ट्स क्लब र न्यू भिजन नेपालले निरन्तर पाँच वर्षदेखि स्थानीय स्तरमा क्रिकेट खेलाडी उत्पादन गर्ने उद्देश्यले अन्तरविद्यालय क्रिकेट प्रतियोगिता आयोजना गर्दै आइरहेका छन् ।
यस प्रतियोगिताका ‘म्यान अफ द सिरिज’ आयुष यादवले आगामी सिजनमा आयोजना हुने नेपाल प्रिमियर लिग (एनपिएल) अन्तर्गत जनकपुर बोल्ट्स टिमको क्याम्पका लागि भारतको चेन्नई जाने अवसर पाउने आयोजकले जनाएको छ । साथै प्रतियोगितामा सहभागी खेलाडी तथा उनीहरूको परिवारलाई हिरा हेल्थ केयरको तर्फबाट उपचार शुल्कमा ३० प्रतिशत छुटको व्यवस्था गरिएको जानकारी पनि आयोजक संस्थाले दिएको छ ।
Discussion about this post