शीतलहरका बेला चिसोबाट जोगिन विद्यार्थीलाई सहयोग, लायन्स क्लबद्वारा सिरक वितरण

जनकपुरधाम/पुस २३ गते । मधेस प्रदेशमा फैलिएको शीतलहरका कारण प्रभावित जनकपुरधाम उपमहानगरपालिका–६ स्थित जनक छात्रावासमा आवासीय रूपमा अध्ययनरत विद्यार्थीहरूका लागि सिरक तथा खाद्यान्न हस्तान्तरण कार्यक्रम सम्पन्न भएको छ।

Lions International, District Council 325F को नेतृत्वमा लायन्स र लियो क्लब अफ जनकपुरधाम, लायन्स क्लब अफ जनकपुरधाम गार्गी तथा लियो क्लब अफ जनकपुरधाम क्यापिटलको संयुक्त सहकार्यमा आयोजित कार्यक्रममा चिसोका कारण कठिनाइ भोगिरहेका विद्यार्थीहरूलाई राहत सामग्री प्रदान गरिएको हो।

कार्यक्रममा लियो क्लब अफ जनकपुरधाम क्यापिटलका अध्यक्ष लियो विकास साहले चिसो मौसममा विद्यार्थीहरूको स्वास्थ्य र अध्ययन सुरक्षित रहोस् भन्ने उद्देश्यले मानवीय प्रयास गरिएको उल्लेख गर्दै सेवा नै लायन्स परिवारको प्रमुख दायित्व भएको बताए। उनले यस्ता सामाजिक तथा मानवीय सहयोगका कार्यक्रमलाई निरन्तरता दिइने प्रतिबद्धता समेत व्यक्त गरे।

आयोजकका अनुसार शीतलहरका कारण दैनिक जीवन प्रभावित बनेका विद्यार्थीहरूलाई तत्काल राहत पुर्‍याउने उद्देश्यले कार्यक्रम आयोजना गरिएको हो। लायन्स क्लबले आगामी दिनहरूमा पनि मधेस प्रदेशका विभिन्न स्थानमा शीतलहर प्रभावित समुदाय लक्षित सहयोग कार्यक्रमहरू सञ्चालन गर्ने जनाएको छ।