सातौँ जनकपुर साहित्य महोत्सव अन्तर्गत अन्तरविद्यालय प्रतियोगिताबाट कथा–कवितामा उत्कृष्ट पाँच छनोट

जनकपुरधाम/पुस २२ गते। सातौँ जनकपुर साहित्य महोत्सवको पूर्वतयारीस्वरूप आयोजना गरिएको अन्तरविद्यालय कथा तथा कविता प्रतियोगिताबाट उत्कृष्ट पाँच–पाँच जना प्रतियोगी छनोट भएका छन्।

सोमबार सम्पन्न अन्तरविद्यालय प्रतियोगितामा कथा तर्फ ३२ तथा कविता तर्फ ३० वटा विद्यालयका छात्रछात्राहरूको सहभागिता रहेको थियो। प्रतियोगिताबाट दुवै विधामा उत्कृष्ट पाँच जना सहभागी छनोट गरिएको आयोजकले जनाएको छ।

कथा विधातर्फ सिन्हा पब्लिक स्कुलकी हर्षिता कुमारी मिश्र, डेफोडिल्स पब्लिक स्कुलकी स्मारिका झा, मोनाष्टिक सेकेन्ड्री बोर्डिङ स्कुलकी गुडिया साह, मोडर्न इङ्ग्लिश बोर्डिङ स्कुलकी आरुषी ठाकुर र ज्ञानदा इन्टरनेशनल स्कुलकी परिधि मिश्र उत्कृष्ट प्रतियोगीका रूपमा छनोट भएका छन्।

त्यसैगरी कविता विधातर्फ डेफोडिल्स पब्लिक स्कुलकी दुर्गेश नन्दनी, संस्कृत विद्या मन्दिरकी दृष्टि यादव, सिन्हा पब्लिक स्कुलकी सोनम साह, पैरागन पब्लिक स्कुलकी दिपाञ्जली पाण्डे र गोगल प्रसाद माध्यमिक विद्यालयकी आस्था झा छनोट भएका छन्।

छनोट भएका सहभागीहरूले सातौँ जनकपुर साहित्य महोत्सवको मुख्य कार्यक्रम अन्तर्गत आफ्ना कथा तथा कविता प्रस्तुति दिनेछन्। अन्तरविद्यालय प्रतियोगिताले विद्यार्थीहरूमा साहित्यप्रतिको रुचि अभिवृद्धि गर्नुका साथै नयाँ प्रतिभा पहिचानमा सहयोग पुर्‍याएको आयोजकको भनाइ छ।