गिरिजानन्द साह/जनकपुरधाम/पौष २१ गते। जनकपुरधामको साहित्य, संस्कृति र सिर्जनशीलताको धरातललाई अझ सुदृढ बनाउने उद्देश्यका साथ सातौँ जनकपुर साहित्य महोत्सवअन्तर्गत अन्तरविद्यालय प्रतियोगिता आइतबारदेखि सुरु भएको छ। अन्तरविद्यालय प्रतियोगिताको उद्घाटन समारोहको प्रमुख अतिथि जनकपुरधाम उपमहानगरपालिकाको मेयर मनोज साह रहनुभएको थियो। प्रतियोगिता अन्तर्गत आइतबार माइ भोट माई च्वाईस शिर्षकको वक्तृत्वकला भएको सम्पन्न भएको छ। जुन प्रतियोगितामा उत्कृष्ट ५ छनोट जना छनोट गरिएको छ। जसमा निर्णायक मण्डलीमा मनिष रमण साह, नित्यानन्द मण्डल र मनिका झा रहेका थिए। नव मिथिला फाउन्डेसनको आयोजनामा सुरु भएको उक्त प्रतियोगितामा बालबालिका तथा युवामा निहित प्रतिभाको पहिचान र प्रवर्द्धनलाई विशेष प्राथमिकता दिइएको आयोजकले जनाएको छ।
‘धरातल, संस्कृति र संस्कारको उत्सव’ भन्ने मूल नारासहित सञ्चालन भइरहेको अन्तरविद्यालय प्रतियोगिता मिथिला नाट्यकला परिषद (मिनाप), जनकपुरधाममा सुरु भएको हो। उद्घाटन समारोहमा साहित्य, कला, संस्कृति तथा शिक्षाक्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो। प्रतियोगिताअन्तर्गत आइतबार वक्तृत्वकला सम्पन्न भएको छ भने सोमबार कविता वाचन र कथा वाचन तथा मंगलबार चित्रकला विधामा विद्यालयस्तरका विद्यार्थीबीच प्रतिस्पर्धा गराइने आयोजकले जानकारी दिएको छ। यी विधामार्फत विद्यार्थीहरूको सिर्जनशीलता, अभिव्यक्ति क्षमता र आत्मविश्वास अभिवृद्धि गर्ने लक्ष्य रहेको नव मिथिला फाउन्डेसनका अध्यक्ष अमित साहले बताए।
आयोजकका अनुसार बालबालिका तथा युवामा साहित्यिक चेतनाको विकास गर्नुका साथै मिथिलाको सांस्कृतिक पहिचानलाई पुस्तान्तरण गर्ने उद्देश्यले जनकपुर साहित्य महोत्सवलाई निरन्तरता दिइँदै आएको हो। सातौँ संस्करणसम्म आइपुग्दा यो महोत्सव स्थानीयस्तरमै प्रतिभा पहिचान र प्रोत्साहन गर्ने विश्वसनीय साझा मञ्चका रूपमा स्थापित हुँदै गएको दाबी गरिएको छ। उद्घाटन समारोहमा सहभागी अतिथिहरूले महोत्सवको महत्व, साहित्य र संस्कृतिको सामाजिक भूमिका तथा भावी पुस्तामा यसको प्रभावबारे आफ्ना धारणा राखेका थिए। नव मिथिला फाउन्डेसनले माघ २२ गतेदेखि सातौँ जनकपुर साहित्य महोत्सव २०८२ आयोजना गर्न लागेको जनाएको छ।
Discussion about this post