जनकपुरधाम/पौष १९ गते । जनकपुरधाममा गत पुष ४ देखि ७ गतेसम्म आयोजित नेपाल जेसीजको ५२औँ राष्ट्रिय महाधिवेशन भव्यताका साथ सफलतापूर्वक सम्पन्न भएको छ। चार दिनसम्म चलेको यस महाधिवेशनले देशभरका जेसीज आवद्ध युवाबाट उच्च प्रशंसा पाएको भन्दै आयोजक जनकपुर जेसीजले पत्रकार सम्मेलनमार्फत आयोजना पूर्ण रुपमा सफल भएको जानकारी दिएको छ।
शनिबार जनकपुरधामस्थित जेसीज सचिवालयमा आयोजित पत्रकार सम्मेलनमा महाधिवेशनका निर्देशक सुधिर पजियारले सन् १९७६ मा स्थापना भएको जनकपुर जेसीजले आफ्नो ५० वर्षे यात्रामा यस वर्ष पाँचौँ पटक राष्ट्रिय महाधिवेशन आयोजना गर्न सफल भएको उल्लेख गरे। उनले यस सफल आयोजनाले जनकपुर जेसीजको गरिमा थप उकासिएको भन्दै खुसी व्यक्त गरे र कार्यक्रम सफल बनाउन सहयोग गर्ने सम्पूर्ण पक्षप्रति आभार प्रकट गरे।
पत्रकार सम्मेलनमा दिइएको जानकारीअनुसार महाधिवेशन आयोजनामा कुल १ करोड ८५ लाख रुपैयाँ खर्च भएको थियो। जसमध्ये १ करोड १० लाख रुपैयाँ दर्ता शुल्कबाट संकलन भएको र बाँकी बक्यौता रकम संकलन भएमा आयोजनामा घाटा नहुने जनकपुर जेसीजका पदाधिकारीहरूले बताएका छन्।
आयोजनामा मुख्य भूमिका निर्वाह गरेका गौतम कुमार साह, राज कुमार साह, मनोज कुमार साह,दिपक यादव,विनय साह,मनोहर ठाकुर लगायत उपस्थित युवाहरूले आफ्नाे सक्रियता र व्यवस्थापन क्षमताको देशभर प्रशंसा भइरहेकोमा गर्व महसुस भएको बताए।
यसै अवसरमा जनकपुर जेसीज सन् १९७६ का अध्यक्ष तथा सल्लाहकार रमेश प्रसाद साहले जेसीजको स्थापना, उद्देश्य र जनकपुर जेसीजको ऐतिहासिक यात्राबारे प्रकाश पार्दै संस्थाले युवाको नेतृत्व विकासमा खेलेको भूमिकाको चर्चा गरेका थिए।
Discussion about this post