जनकपुरधाम/पुष १९ गते। जनकपुरधामको साहित्य, संस्कृति र सिर्जनशीलताको धरातललाई अझ सुदृढ बनाउने उद्देश्यका साथ सातौँ जनकपुर साहित्य महोत्सवअन्तर्गत अन्तरविद्यालय प्रतियोगिता आइतबार आयोजना हुने भएको छ। नव मिथिला फाउन्डेसनको आयोजनामा हुन लागेको उक्त प्रतियोगितामा बालबालिका तथा युवामा निहित प्रतिभाको पहिचान र प्रवद्र्धनलाई विशेष प्राथमिकता दिइएको आयोजकले जनाएको छ।
‘धरातल, संस्कृति र संस्कारको उत्सव’ भन्ने मूल नारासहित सञ्चालन हुने अन्तरविद्यालय प्रतियोगिता मिथिला नाट्यकला परिषद (मिनाप), जनकपुरधाममा बिहान १०ः३० बजेदेखि सुरु हुनेछ। उद्घाटन समारोहमा साहित्य, कला, संस्कृति तथा शिक्षाक्षेत्रका विशिष्ट व्यक्तित्वहरूको गरिमामय उपस्थिति रहने आयोजकको भनाइ छ।
प्रतियोगिताअन्तर्गत वक्तृत्वकला, कविता वाचन, कथा वाचन तथा चित्रकला विधामा विद्यालयस्तरका विद्यार्थीबीच प्रतिस्पर्धा गराइनेछ। यी विधामार्फत विद्यार्थीहरूको सिर्जनशीलता, अभिव्यक्ति क्षमता र आत्मविश्वास अभिवृद्धि गर्ने लक्ष्य रहेको नव मिथिला फाउन्डेसनका अध्यक्ष अमित साहले बताए।
आयोजकका अनुसार बालबालिका तथा युवामा साहित्यिक चेतनाको विकास गर्नुका साथै मिथिलाको सांस्कृतिक पहिचानलाई पुस्तान्तरण गर्ने उद्देश्यले जनकपुर साहित्य महोत्सवलाई निरन्तरता दिइँदै आएको हो। सातौँ संस्करणसम्म आइपुग्दा यो महोत्सव स्थानीयस्तरमै प्रतिभा पहिचान र प्रोत्साहन गर्ने विश्वसनीय साझा मञ्चका रूपमा स्थापित हुँदै गएको दाबी गरिएको छ।
उद्घाटन समारोहमा सहभागी अतिथिहरूले महोत्सवको महत्व, साहित्य र संस्कृतिको सामाजिक भूमिका तथा भावी पुस्तामा यसको प्रभावबारे आफ्ना धारणा राख्ने कार्यक्रम छ। नव मिथिला फाउन्डेसनले माघ २२ गतेदेखि सातौँ जनकपुर साहित्य महोत्सव २०८२ आयोजना गर्न लागेको जनाएको छ।
Discussion about this post