गिरिजानन्द साह/जनकपुरधाम/पुस १७ गते। जनकपुरधाममा प्लास्टिक मुक्त भोलि (Plastic Free Tomorrow) अभियान अन्तर्गत वडा संवाद कार्यक्रम सम्पन्न भएको छ। Youth for Climate & Social Action (YCSA), ब्रिटिश काउन्सिल नेपाल, Association of Youth Organizations Nepal (AYON) तथा प्लास्टिक बिनाके बिहानको संयुक्त आयोजनामा कार्यक्रम सम्पन्न भएको हो।
कार्यक्रमका प्रमुख अतिथि जनकपुरधाम उपमहानगरपालिकाको उपमेयर किशोरी साह रहनुभएको थियो। कार्यक्रममा प्लास्टिक मुक्त भोलि अभियान अन्तर्गत हालसम्म गरिएका गतिविधि, उपलब्धि र सिकाइबारे स्लाइड प्रस्तुतिकरणसहित जानकारी दिइएको थियो।
जनकपुरधाममा प्लास्टिक प्रदूषण गम्भीर वातावरणीय समस्याका रूपमा देखापरेको उल्लेख गर्दै अभियानका संयोजक विकाश साहले शहरको कुल फोहोरमध्ये ३० प्रतिशतभन्दा बढी एकपटक प्रयोग हुने प्लास्टिक रहेको बताए। यसका कारण नाली जाम हुने, शहरी बाढी आउने र दीर्घकालीन पारिस्थितिक क्षति हुने समस्या बारम्बार देखा परेको उनको भनाइ थियो। यिनै चुनौतीलाई सम्बोधन गर्न प्लास्टिक मुक्त भोलि अभियान सञ्चालन गरिएको उनले स्पष्ट पारे।
कार्यक्रममा पिंकी शर्माले स्लाइड प्रस्तुतीकरणमार्फत अभियान अन्तर्गत युवाहरूलाई प्रत्यक्ष जलवायु कार्यमा संलग्न गराउने उद्देश्यले गरिएको प्लास्टिक संकलन दौड, जनकपुरधाम वडा नं. १३ स्थित कबाड हलमा पसले तालिम तथा कपडाको झोला वितरण, प्लास्टिक प्रदूषणबारे जनचेतना अभिवृद्धि गर्न पेठिया बजारमा सडक नाटक र साइकल र्याली गरिएको जानकारी गराइन्।
अभियानबाट हालसम्म ५०० भन्दा बढी व्यक्तिमा प्रत्यक्ष पहुँच पुगेको, १८ हजारभन्दा बढी भर्चुअल पहुँच हासिल भएको, स्थानीय सञ्चारमाध्यममा प्रसारण भएको तथा ७ भन्दा बढी टोली सक्रिय रूपमा संलग्न रहेको आयोजकले जनाएका छन्। साथै स्थानीय सरकारी प्रतिनिधिहरूबाट प्रत्यक्ष अनुगमन, सडक नाटक र साइकल र्यालीमार्फत व्यापक जनचेतना, टोली सदस्यहरूमा नेतृत्व क्षमता र स्वामित्व भावना वृद्धि भएको पनि उल्लेख गरिएको छ।
जनकपुरधामका वडा नं. १० र १३ मा नमूना पहलका रूपमा अभियान सफलतापूर्वक कार्यान्वयन भइसकेको र अब यसलाई सम्पूर्ण शहरभर विस्तार गर्ने लक्ष्य रहेको संयोजक विकाश साहले बताए। हालसम्म प्राप्त सिकाइ, स्थापना भइसकेका इको–क्लबहरू र समुदायिक सञ्जालको आधारमा शहरभर दीर्घकालीन व्यवहार परिवर्तन र वातावरणीय दिगोपन ल्याउने विश्वास आयोजकले व्यक्त गरेका छन्।
कार्यक्रममा उपमेयर किशोरी साह, वडा नं. १० र १३ का जनप्रतिनिधि, पत्रकार, युवा तथा विभिन्न सरोकारवालाहरूको उपस्थिति रहेको थियो।
Discussion about this post