जनकपुरधाम/पुस १५ गते। जनकपुरधामस्थित मिथिला नाट्य कला परिषद् (मिनाप) को नवनिर्वाचित कार्यसमितिको शपथ ग्रहण तथा पद हस्तान्तरण कार्यक्रम सम्पन्न भएको छ। शपथ ग्रहणसँगै नवनिर्वाचित कार्यसमितिले औपचारिक रूपमा कार्यभार सम्हालेको छ।
कार्यक्रममा अध्यक्ष मण्डलका संयोजक रमेश रञ्जन झाले नवनिर्वाचित पदाधिकारीहरूलाई शपथ ग्रहण गराएका थिए। त्यसपछि निवर्तमान अध्यक्ष प्रमेश झाले नवनिर्वाचित अध्यक्ष सुनिल मल्लिकलाई माइन्युट रजिस्टर तथा कार्यालयको चाभी हस्तान्तरण गर्दै पद हस्तान्तरण गरेका थिए।
नवनिर्वाचित अध्यक्ष सुनिल मल्लिकले संस्थालाई थप सशक्त, व्यवस्थित र प्रभावकारी बनाउँदै मिथिला नाट्यकला प्रवद्र्धनमा सक्रिय रूपमा काम गर्ने प्रतिबद्धता व्यक्त गरे। उनले कलाकारहरूको क्षमता अभिवृद्धि, योजनाबद्ध विकास र संस्थागत सुदृढीकरणलाई प्राथमिकतामा राखेर अघि बढ्ने बताए।
कार्यक्रममा जनकपुरधाम उपमहानगरपालिकाका नगरप्रमुख मनोजकुमार साह, मैथिली विकास कोषका अध्यक्ष जीवनाथ चौधरी, कलाकार, पत्रकार तथा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो।
Discussion about this post