पुस १३ गते। प्रेस चौतारी नेपाल धनुषा शाखाको बैठक आज शाखाका अध्यक्ष नबिन प्रियदर्शीको अध्यक्षता र इन्चार्ज अवधेश कामतको प्रमुख आतिथ्यमा सम्पन्न भएको छ। बैठक जनकपुरधाममा बसेको हो, जहाँ संगठनमा आबद्ध पत्रकारहरुको पेसागत चुनौती र सञ्चार माध्यमको वर्तमान अवस्था तथा समाधान उपायबारे महत्वपूर्ण छलफल भएको छ।
बैठकमा प्रेस चौतारी नेपाल धनुषा शाखाका पदाधिकारी तथा सदस्यहरुको सहभागिता रहेको थियो। कार्यक्रमको संचालन सुनिल कुमार साहले गरेका थिए। बैठकमा सहभागी पत्रकारहरुले हालको आर्थिक सङ्कट, दैनिक कामकाजमा देखिने विभिन्न व्यावसायिक चुनौती, सुरक्षा, अभिव्यक्ति स्वतन्त्रता, संगठनात्मक सुदृढीकरण लगायतका विषयमा आ–आफ्ना धारणा राख्दै समाधानका लागि पहल र एकताबद्धतासँगै अगाडि बढ्नुपर्नेमा जोड दिएका थिए।
बैठकले प्रेस चौतारीमा आबद्ध पत्रकारहरुको पेसागत हकहित संरक्षण, क्षमता विकास, तथा स्थानीय तहमा प्रभावकारी संचारिक हस्तक्षेप आवश्यक रहेको निष्कर्ष निकाल्यो। साथै, पत्रकारहरुको मनोबल वृद्धि, ऐक्यबद्धता सुदृढीकरण र संस्थागत उपस्थितिलाई अझ सबल बनाउनका लागि नीतिगत संरचना मजबूत गर्ने तयारीबारे पनि छलफल भयो।
यसै क्रममा, प्रेस चौतारी नेपाल धनुषा शाखाले नजिकै प्रेस चौतारीको बृहत भेला आयोजना गर्ने निर्णय सर्वसम्मतिले गरेको छ। भेलाका तयारी, कार्यसूची एवं आवश्यक व्यवस्थापनका लागि छुट्टै संयोजन समिति गठन गर्ने निर्णय समेत भएको छ।
प्रमुख अतिथि अवधेश कामतले संगठनलाई मजबुत बनाउन समर्पण, लगनशीलता र एकता महत्वपूर्ण भएको बताए। उनले संगठनमा आबद्ध सदस्यहरूले आत्मविश्वासका साथ काम गर्नुपर्ने र संगठनले पनि योग्य तथा सक्रिय सदस्यहरूको मूल्यांकन गर्दै सक्षम नेतृत्व चयनमा ध्यान दिनुपर्ने सुझाव प्रस्तुत गरे।
बैठक सकिँदा अध्यक्ष प्रियदर्शीले सबैलाई धन्यवाद व्यक्त गर्दै निर्णय कार्यान्वयनमा सक्रिय भूमिका निर्वाह गर्न अनुरोध गरे।
Discussion about this post