गिरिजानन्द साह/जनकपुरधाम/पुष ७ गते। जलवायु परिवर्तनका प्रभाव, चुनौती र समाधानका विषयमा केन्द्रित दुई दिने कार्यशाला गोष्ठी जनकपुरधाममा सफलतापूर्वक सम्पन्न भएको छ। गोष्ठी राष्ट्रिय आदिवासी जनजाती अपाङ्ग महिला संघ (NIDWAN) र मधेस आदिवासी जनजाती अपाङ्ग महिला संघ (MIDWAN) को संयुक्त आयोजनामा सम्पन्न भएको हो।
कार्यक्रम एनवाईसीए (NYCA) जनकपुरधाम र कायापलट को सहकार्यमा तथा पवन (PAWAN) फन्ड को आर्थिक सहयोगमा आयोजना गरिएको मधेस आदिवासी जनजाती अपाङ्ग महिला संघ (MIDWAN) को अध्यक्ष दिपिका लामाले जनाएको छ।
गोष्ठीमा मधेस प्रदेशमा देखिँदै आएका जलवायु परिवर्तनका असर, त्यसले समुदाय विशेषगरी महिला, आदिवासी जनजाति तथा अपाङ्गता भएका व्यक्तिहरूमा पार्ने प्रभावका विषयमा विस्तृत छलफल गरिएको थियो। सहभागीहरूलाई जलवायु परिवर्तनसम्बन्धी आधारभूत तथा व्यावहारिक ज्ञान प्रदान गर्नुका साथै क्षमता विकास, जलवायु सम्बन्धी अनुसन्धान (रिसर्च) को आवश्यकता र सम्भावनाबारे कार्यशाला सञ्चालन गरिएको थियो।
कार्यक्रम अन्तर्गत विज्ञहरूसँग प्यानल छलफल, विषयगत प्रस्तुतीकरण तथा समुहगत छलफलहरू आयोजना गरिएका थिए। समुहगत छलफलमार्फत स्थानीय स्तरमा जलवायु परिवर्तन न्यूनीकरण र अनुकूलनका उपायहरू, नीति निर्माणमा समुदायको भूमिका तथा समावेशी दृष्टिकोणको महत्वबारे सहभागीहरूले आफ्ना धारणा राखेका थिए।
आयोजक संस्थाहरूले जलवायु परिवर्तनको मुद्दामा सबै समुदायको समान सहभागिता आवश्यक रहेको उल्लेख गर्दै, यस्ता गोष्ठीहरूले नीतिनिर्माता र सरोकारवालालाई व्यवहारिक सुझाव प्रदान गर्ने विश्वास व्यक्त गरेका छन्। गोष्ठीको समापनसँगै सहभागीहरूले आगामी दिनमा स्थानीय तहदेखि प्रदेशस्तरसम्म जलवायु सचेतना अभिवृद्धि तथा अनुसन्धानमूलक गतिविधि निरन्तर अघि बढाउने प्रतिबद्धता जनाएका छन्।
Discussion about this post