गिरिजानन्द साह/जनकपुरधाम/मङ्सिर २१ गते । लैंगिक हिंसा विरुद्धको १६ दिने अभियानअन्तर्गत महिला उत्तरदायित्व सम्बन्धि अन्तरक्रिया कार्यक्रम जनकपुरधाममा सम्पन्न भएको छ। साथ साथ सिकाई संजाल धनुषाको आयोजनामा र मानव अधिकारका लागि एकल महिला समूहको सहकार्यमा जनकपुरधाम उद्योग वाणिज्य संघको सभाहलमा आयोजित कार्यक्रममा महिलामाथि हुने हिंसा न्यूनीकरण तथा उत्तरदायी समाज निर्माणका विषयमा विस्तृत छलफल गरिएको थियो।
कार्यक्रमको अध्यक्षता साथ साथ सिकाई संजाल धनुषाकी अध्यक्ष रिन्कु साहले गरेकी थिइन्। जनकपुरधाम उपमहानगरपालिकाको उपप्रमुख किशोरी साह प्रमुख अतिथिका रूपमा उपस्थित रहँदै स्थानीय तहले लैंगिक हिंसा न्यूनीकरणका लागि अपनाइरहेका पहल तथा आगामी योजनाबारे धारणा राखेका थिए ।महिलालाई उत्तरदायी बनाउने अर्थ उनीहरूलाई जिम्मेवारी थोपर्ने होइन; बरु उनीहरूले अधिकार, अवसर र स्रोतमा बराबरी पहुँच पाउने वातावरण निर्माण गर्नु हो। राज्य, सरोकारवाला निकाय र समुदाय सबै मिलेर महिलाहरूलाई निर्णय गर्न सक्षम बनाउने आधार तयार पारिनुपर्ने बताए।
कार्यक्रमका विशिष्ट अतिथिमा जनकपुरधाम उद्योग वाणिज्य संघका अध्यक्ष सुरेन्द्र भण्डारी, मानव अधिकारका लागि एकल महिला समूहकी प्रतिनिधि शुभद्रा आले, र फेडो (FEDO) तर्फबाट सरस्वती मण्डल सहभागी रहेका थिए। सुरेन्द्र भण्डारीले समुदाय, सरकारी निकाय र सरोकारवालाबीचको सहकार्यले मात्र लैंगिक हिंसाको प्रभावकारी नियन्त्रण सम्भव हुनेमा जोड दिए। महिला सशक्तीकरणका कुरा केवल नारामा सीमित रहेर होइन, व्यवहारमा रुपान्तरण हुँदै समुदायको जीवनस्तर उठाउनुपर्ने बताए।
वक्ताहरूले महिलामाथि हुने शारीरिक, मानसिक, आर्थिक तथा सामाजिक हिंसाका स्वरूपबारे चर्चा गर्दै पीडितले आत्मविश्वासका साथ न्यायिक तथा सहयोगी निकायसम्म पुग्न सक्ने वातावरण निर्माण गर्न सबै तह र क्षेत्रबाट पहल आवश्यक रहेको बताए। साथै, महिला उत्तरदायित्व, न्याय पहुँच, सचेतनामूलक कार्यक्रम विस्तार तथा सुरक्षित समुदाय निर्माणका विषयमा व्यवहारिक सुझावहरू पेश गरिएको थियो।
अन्तरक्रियामा सहभागी महिलाहरूले हिंसाविरुद्ध रिपोर्टिङ, कानुनी उपचार, सामाजिक सहयोग र सुरक्षित कार्यस्थलका विषयमा आफ्ना अनुभव र मागहरू राखे। अन्तरक्रिया कार्यक्रममा सरस्वती मण्डलले कार्यक्रम बारे प्रकाश पारे भने कार्यक्रमको संचालन संचारकर्मी आरती मण्डलले गरेकी थिइन्। कार्यक्रमको समापन गर्दै अध्यक्ष रिन्कु साहले १६ दिने अभियानअन्तर्गत आयोजित यस्तो अन्तरक्रियाले महिलाहरूको सशक्तीकरण र हिंसामुक्त समाज निर्माणमा महत्वपूर्ण योगदान पुर्याउने विश्वास व्यक्त गरिन्। उनले कार्यक्रम सफल बनाउन सहयोग गर्ने सबैप्रति आभार व्यक्त गर्दै आगामी दिनमा पनि यस्ता पहल निरन्तर अघि बढाइने प्रतिबद्धता जनाइन। कार्यक्रममा जनकपुरधाम उद्योग वाणिज्य संघका अध्यक्ष सुरेन्द्र भण्डारी, मानव अधिकारका लागि एकल महिला समूहकी प्रतिनिधि शुभद्रा आले, र फेडो (FEDO) तर्फबाट सरस्वती मण्डल स्थानीय सरोकारवाला सहित विभिन्न संघ–संस्थाका प्रतिनिधिहरूको उल्लेखनीय सहभागिता रहेको थियो।
Discussion about this post