धनुषा/कार्तिक ३० गते। धनुषाको मिथिला बिहारी नगरपालिका–९ का वडाध्यक्ष बिन्देश्वर यादवको गोली हानेर हत्या गरेको आरोपमा चार जना पक्राउ परेका छन्।
पक्राउ पर्नेमा ३५ वर्षीय शम्भु कुमार यादव, ३० वर्षीय धर्मनाथ यादव, २८ वर्षीय पप्पु यादव र २८ वर्षीय मनोज कुमार यादव रहेका छन्। पक्राउ परेकामध्ये शम्भु कुमार यादव जिल्ला प्रहरी कार्यालय सप्तरीमा कार्यरत प्रहरी सहायक हवलदार भएको जिल्ला प्रहरी कार्यालय धनुषाले जानकारी दिएको छ।
घटना सोही वडाको अन्दुपट्टीका दुखी यादवको मृत्यु संस्कारपछि भएको १० दिने भोज ढिलो सुरु भएको विषयमा उत्पन्न विवाद चर्किएपछि झैझगडा बढ्दै जाँदा सहायक हवलदार शम्भुले आफ्नै कटुवा पेस्तोल प्रयोग गरी वडाध्यक्ष यादवको छातीमा गोली प्रहार गरेका थिए। गम्भीर रूपमा घाइते भएका वडाध्यक्षको उपचारकै क्रममा मृत्यु भएको थियो।
पक्राउ परेकाको साथबाट एक थान कटुवा पेस्तोल र एक राउन्ड गोलीको खोका समेत बरामद गरेको प्रहरीले जनाएको छ। घटना सम्बन्धमा जिल्ला अदालत धनुषाबाट म्याद लिएर थप अनुसन्धान जारी रहेको प्रहरी नायव उपरीक्षक गणेश बहादुर बमले जानकारी दिए।
Discussion about this post