जनकपुरधाम/कार्तिक १५ गते। नेपाल जेसीजको ५२औं राष्ट्रिय महाधिवेशन आगामी पौष ४ देखि ७ गतेसम्म जनकपुरधाममा हुने भएको छ। जनकपुर जेसीजको आतिथ्यमा हुन लागेको यस ऐतिहासिक महाधिवेशनको तयारी तीव्र गतिमा भइरहेको छ।
महाधिवेशनको सफल आयोजनाका लागि जेसी सुधीर पजियारको नेतृत्वमा विभिन्न समिति तथा उपसमिति गठन गरिएको जनकपुर जेसीजले जनाएको छ। नेपाल जेसीजको सुवर्ण वर्ष अर्थात् ५० वर्षे गौरवशाली यात्राको अवसरमा आयोजना हुन लागेको यो महाधिवेशनलाई विशेष र ऐतिहासिक बनाउन जनकपुर जेसीजका सबै सदस्यहरू जुटेका छन्। कार्यक्रमस्थल व्यवस्थापनदेखि पाहुना स्वागत, सांस्कृतिक प्रस्तुति, आवास र यातायात व्यवस्थासम्मका सबै पक्षलाई व्यवस्थित बनाउने तयारी भइरहेको छ।
नेपाल जेसीजको सुवर्ण वर्षको अवसरमा जनकपुरधाममा आयोजना हुन लागेको यो महाधिवेशनलाई ऐतिहासिक र गौरवशाली बनाउन जनकपुर जेसीजका सबै सदस्यहरू निरन्तर खटिएका छन्।
जनकपुर जेसीज वर्ष २०२५ का अध्यक्ष जेसी मुकेश साहले महाधिवेशन सफल पार्न सम्पूर्ण सदस्य, पूर्वअध्यक्ष, शुभेच्छुक र सहयोगीहरूलाई सक्रिय सहभागिताका लागि आह्वान गरेका छन्। वहाँका अनुसार देशका सबै ७ प्रदेशका साथै पूर्व मेचीदेखि पश्चिम महाकालीसम्मका प्रतिनिधिहरू सहभागी हुने यस महाधिवेशनमा करिब हजारौँ जेसी सदस्यहरूको उपस्थिती रहने अपेक्षा गरिएको छ। जनकपुरधामका होटल, धर्मशाला, यातायात र सांस्कृतिक स्थलहरूलाई स्वागतका लागि तयारी अवस्थामा ल्याउन पहल गरिएको छ।
महाधिवेशनको अब करिब डेढ महिना मात्र बाँकी रहँदा जनकपुरधामलाई आकर्षक र व्यवस्थित रुपमा प्रस्तुत गर्न स्थानीय सरसफाइ, सजावट र स्वागत व्यवस्थासमेत सुरु गरिएको छ। जनकपुर जेसीजका पदाधिकारीहरूका अनुसार, जनकपुरधामलाई राष्ट्रिय महाधिवेशनको केन्द्र बनाउन सम्पूर्ण जनकपुरबासी पनि उत्साहित र आतुर बनेका छन्।
नेपाल जेसीजको ५२औं राष्ट्रिय महाधिवेशनले मधेसको ऐतिहासिक सांस्कृतिक सहर जनकपुरधामलाई राष्ट्रिय स्तरमा अझ प्रख्यात बनाउन सहयोग पुग्ने विश्वास जनकपुर जेसीजले व्यक्त गरेका छन्।
Discussion about this post