गिरिजानन्द साह/जनकपुरधाम/असोज ९ गते। जेनजी आन्दोलनका क्रममा तोडफोड र आगजनीका कारण क्षति पुगेका प्रहरी संरचनाहरू पुनर्निर्माणका लागि जीवन विकास लघुवित्त वित्तीय संस्थाको शाखा कार्यालय जनकपुर र सबैलाले सहयोग गरेको छ। संस्थाले प्रहरी सेवाको सहज सञ्चालन र स्थानीय बासिन्दालाई सुरक्षित वातावरण प्रदान गर्ने उद्देश्यले जनकपुरधाम र सबैलामा रहेका प्रहरी चौकी तथा प्रहरी बिट पुनर्निर्माणमा आर्थिक तथा सामग्री सहयोग गरेको हो।
जनकपुरधामस्थित जीवन विकास लघुवित्त शाखा कार्यालयका अनुसार जनकपुरधामको जिरोमाईल प्रहरी चौकीको प्रतीक्षालय (वेटिङ हॉल) जेनजी आन्दोलनका क्रममा क्षति भएपछि पुनःनिर्माणका लागि सहयोग गरिएको शाखा कार्यालय जनकपुरका कार्यालय प्रमुख दिनेश राजबंशीले बताए। संस्थाले आवश्यक सामग्री तथा जनशक्ति व्यवस्थापनमा सक्रिय भूमिका निर्वाह गर्दै प्रतीक्षालयलाई आधुनिक स्वरूपमा निर्माण गरेको उनले बताए।
यस्तै, सवैला नगरपालिका–९ मा रहेको प्रहरी बिट पनि उक्त आन्दोलनका क्रममा क्षतिग्रस्त भएकोले त्यसको पुनर्निर्माणमा जीवन विकास लघुवित्तको शाखा कार्यालय सैवलाले सहयोग गरेको हो। यसले प्रहरीलाई स्थानीयस्तरमा प्रभावकारी रूपमा सेवा प्रवाह गर्न सहज बनाउने विश्वास व्यक्त गरिएको छ।
कार्यक्रमका क्रममा जीवन विकास लघुवित्तका शाखा कार्यालय सबैलाका प्रबन्धक ललित रायले समाजिक उत्तरदायित्व अन्तर्गत संस्थाले समुदायको आवश्यकता अनुसार विभिन्न सहयोग गर्दै आएको जानकारी दिए। उनले प्रहरी चौकी र प्रहरी बिट पुनर्निर्माणका लागि गरिएको सहयोगबाट प्रहरी सेवा अझ सशक्त र सहज हुने अपेक्षा व्यक्त गरे।
स्थानीय बासिन्दाले जीवन विकास लघुवित्तको यो पहललाई सराहना गर्दै प्रहरी चौकी तथा प्रहरी बिटको पुनर्निर्माणले सुरक्षाप्रति जनताको विश्वास बलियो बन्ने बताएका छन्। जेनजी आन्दोलनका क्रममा जनकपुरधाम र आसपासका क्षेत्रमा प्रहरी चौकी तथा प्रहरी बिटमा तोडफोड, आगजनी तथा अन्य क्षति पुगेका थिए। ती संरचनाहरू पुनर्निर्माण नहुँदा प्रहरी सेवामा कठिनाई भइरहेको अवस्थामा जीवन विकास लघुवित्तको यो सहयोगले राहत पुगेको प्रहरी स्रोतले जनाएको छ।
Discussion about this post