जनकपुरधाम/भदौ १८ गते। जनकपुरधाममा प्रत्येक वर्षझैँ यस वर्ष पनि दशैँ बजार (सस्ता बजार) लाग्ने भएको छ। दशैँ–तिहारलाई लक्षित गरी उपभोक्तालाई किफायती दरमा सामान उपलब्ध गराउने उद्देश्यले लाग्ने यस बजारलाई यसपटक थप व्यवस्थित र आकर्षक बनाउने तयारी गरिएको छ।
बुधबार जनकपुरधाम उद्योग वाणिज्य संघको सभाहलमा सरोकारवाला निकायबीच सम्पन्न छलफलमा बजार अनुगमन, सामानको गुणस्तर परीक्षण, सुरक्षा व्यवस्था लगायतका विषयमा विशेष छलफल गरिएको थियो। साथै, यस वर्ष स्थानीय उत्पादनलाई प्राथमिकता दिने विषयमा सहभागीहरुले जोड दिएका छन्।
संघका अध्यक्ष सुरेन्द्र भण्डारीले ४० वर्षदेखि निरन्तर लाग्दै आएको दशैँ बजारलाई अझ व्यवस्थित बनाउन विशेष तयारी भइरहेको उल्लेख गर्दै यस वर्ष साबुन, अगरबत्ती, डिटरजेन्ट पाउडर, खाद्य पदार्थसहित यस क्षेत्रमा उत्पादन भएका अन्य सामग्रीलाई पनि बिक्रीका लागि राखिने जानकारी दिए।
उनका अनुसार असोज ६ गते घटस्थापनाकै दिनदेखि जनकपुरधामस्थित गोपाल धर्मशालामा दशैँ बजार सुरु हुने छ। छलफलमा आगामी दिनमा जनकपुरधाममा रात्रिकालिन बजार सञ्चालन गर्ने विषयमा समेत पहल अघि बढाउनेबारे सरोकारवालाबीच चर्चा गरिएको थियो।
Beta feature
Discussion about this post