जनकपुरधाम/असार २५ गते। जनकपुरधाम उपमहानगरपालिका–१५ मा चक्कु प्रहार गरी ससुराको हत्या गर्ने ज्वाइँ पक्राउ परेका छन् । बुधबार धनुषा प्रहरीले पत्रकार सम्मेलन गरेर जनकपुरधाम उपमहानगरपालिका–१५ का ६५ वर्षीय वासुदेव प्रसाद साहको हत्या अभियोगमा ज्वाइँ बेचन महासेठलाई पक्राउ गरी सार्वजनिक गरेको छ ।
जनकपुरधाम १५ का ६५ वर्षीय वासुदेव प्रसाद साहलाई यही असार १८ गते चक्कु प्रहार गरी हत्या गरिएको थियो। प्रहरीका अनुसार घटनामा प्रयोग भएको चक्कु र आरोपी चढेको प्रदेश ०२–००७प ९९३२ नम्बरको स्कुटर समेत घटनास्थलबाट बरामद गरिएको छ।
धनुषाका प्रहरी प्रमुख एसपी नरहरि रेग्मीले प्रारम्भिक अनुसन्धानमा घरायसी र लेनदेनसम्बन्धी विवाद कारण बनेको जनाएका छन्। घटनापछि फरार रहेका आरोपी महासेठलाई मृतकका श्रीमती शैलदेवीको जाहेरीका आधारमा मंगलबार खजुरी रेलवे स्टेशन नजिकैबाट पक्राउ गरिएको हो।
हाल आरोपी प्रहरी नियन्त्रणमा छन् भने घटनाबारे थप अनुसन्धान भइरहेको जिल्ला प्रहरी कार्यालय धनुषाले जानकारी दिएको छ।
Discussion about this post