गिरिजानन्द साह/जनकपुरधाम/असार ८ गते। जनकपुरधाममा लागुऔषध दुव्र्यसन तथा यसको नियन्त्रण सम्बन्धी दुई दिने तालिम सुरु भएको छ। जनकपुरधाम उपमहानगरपालिकाको सहयोग र नेपाल जनहित कल्याण केन्द्र, जलेश्वर–३ को आयोजनामा सुरु गरिएको तालिम आजदेखि संचालनमा आएको हो।
तालिममा जनकपुरधाम उपमहानगरपालिका अन्तर्गतका २५ वटै वडालाई समेटिएको छ। समाजको विपन्न वर्ग र संवेदनशील क्षेत्रका समुदायका किशोर–किशोरी तथा युवा–युवतीहरुलाई लक्षित गरी तालिम आयोजना गरिएको आयोजक संस्था नेपाल जनहित कल्याण केन्द्रले जनाएको छ।
कार्यक्रमको अध्यक्षता तालिम संयोजक संजिप कुमार यादवले गरेका थिए भने प्रमुख अतिथिका रुपमा जनता समाजवादी पार्टी (जसपा) का वरिष्ठ उपाध्यक्ष रामचन्द्र साह उपस्थित थिए। कार्यक्रममा विशिष्ट अतिथिका रुपमा स्थानीय जनप्रतिनिधि, समाजसेवी र विद्यालय प्रतिनिधिहरुको पनि उपस्थिति रहेको थियो।
प्रमुख अतिथि साहले समाजमा बढ्दो लागुऔषध दुव्र्यसनले युवा पुस्तालाई गलत दिशातर्फ धकेलिरहेको बताउँदै यसको रोकथामका लागि जनस्तरबाटै सचेतना फैलाउनुपर्नेमा जोड दिनुभयो। तालिममा सहभागीलाई लागुऔषधको असर, रोकथामका उपाय, परामर्श सेवा तथा पुनःस्थापना प्रक्रियाबारे जानकारी दिइएको छ।
कार्यक्रम दुई दिनसम्म संचालन हुनेछ भने अन्त्यमा सहभागीलाई प्रमाणपत्र समेत वितरण गरिने जनाइएको छ।
Discussion about this post