‘मधेस टुरिज्म मीट २०२५’ जनकपुरधाम : नेपाल–भारतबीचको सम्बन्ध अझ सुदृढ बनाउन नगरप्रमुख साहको आह्वान

जनकपुरधाम/जेठ ३१ गते। नेपाल–भारतबीचको ऐतिहासिक, धार्मिक र सांस्कृतिक सम्बन्धलाई अझ सुदृढ बनाउने उद्देश्यले ‘मधेस टुरिज्म मीट २०२५’ कार्यक्रम जनकपुरधाममा सम्पन्न भएको छ। नेपाल पर्यटन बोर्ड र जनकपुरधाम उपमहानगरपालिकाको संयुक्त आयोजनामा तीन दिनसम्म चल्ने यो कार्यक्रममा पर्यटनको विविध पक्षमाथि गहन छलफल भएको थियो ।

कार्यक्रमको उद्घाटन सत्रलाई सम्बोधन गर्दै जनकपुरधाम उपमहानगरपालिकाका नगरप्रमुख मनोजकुमार साहले मिथिला र अवधबीचको प्राचीन सम्बन्धलाई स्मरण गर्दै भने, “त्रेता युगदेखि नै मिथिला र अवधबीच गहिरो सम्बन्ध रहेको छ। देशको सिमाना जति नै बाँडिएको भए पनि, मिथिलावासीको भावना र सांस्कृतिक एकता कहिल्यै बाँडिदैन।”

नगरप्रमुख साहले मिथिला क्षेत्रको धार्मिक र सांस्कृतिक महत्त्व उजागर गर्दै ‘मिथिला मध्यमा परिक्रमा’ जस्ता परम्परागत अभ्यासहरूलाई प्रवर्द्धन गर्नुपर्ने आवश्यकता औँल्याए। उनले विश्वास व्यक्त गरे कि यस्ता धार्मिक यात्रा कार्यक्रमहरूले मिथिलाको वैश्विक पहिचान मजबुत बनाउने छन्।

नेपाल–भारतबीचको भिसा नलाग्ने सम्बन्धलाई ‘विशेष र दुर्लभ उदाहरण’ का रूपमा उल्लेख गर्दै साहले भने, “संसारमा थोरै देश मात्र छन् जहाँ यस्तो खुला सम्बन्ध कायम छ। यसले दुई देशबीचको आत्मीयता र विश्वासको गहिराइ देखाउँछ।”

कार्यक्रममा नेपाल पर्यटन बोर्डका निर्देशक हिक्मत सिंह शेरे, उद्योग वाणिज्य संघ मधेस प्रदेशका उपाध्यक्ष जितेन्द्र महासेठ, जानकी मन्दिरका उत्तराधिकारी महन्थ रामरोशन दास वैष्णव, भारतका पर्यटन अभियन्ता डा. कौलेश कुमारलगायत नेपाल र भारतका धार्मिक, सांस्कृतिक र पर्यटन क्षेत्रका विशिष्ट व्यक्तिहरूको उपस्थिति रहेको थियो।

तीन दिनसम्म चल्ने यस कार्यक्रमको माध्यमबाट मधेस क्षेत्रको पर्यटन सम्भावना र रणनीतिमाथि विस्तृत छलफल गरिने जनाइएको छ।