जनकपुरधाममा “पुस्ता देखि पुस्ता” कार्यक्रम सम्पन्न, पत्रकारितामा पुस्तान्तरणको अनुभव साझा

गिरिजानन्द साह/जनकपुरधाम/जेठ ३१ गते। कायापलट संस्थाको आयोजनामा, नेपाल पत्रकार महासंघ धनुषा र इन्टरनेशनल अलर्टको सहकार्य तथा युरोपियन युनियनको आर्थिक तथा प्राविधिक सहयोगमा जनकपुरधाममा “पुस्ता देखि पुस्ता” शीर्षकको कार्यक्रम भव्य रूपमा सम्पन्न भएको छ। कार्यक्रमले पत्रकारिताको परिवर्तनशील यात्रा र नयाँ पुस्तालाई मार्गदर्शन गर्ने उद्देश्यले पुराना अनुभवहरूलाई साझा गर्ने सन्दर्भमा विशेष महत्व राखेको छ।

कार्यक्रमको अध्यक्षता कायापलट संस्थाका संस्थापक अध्यक्ष दिवाकर उप्रेतीले गरेका थिए। कार्यक्रममा “हिजोको पत्रकारिता अनुभव : आजको मार्गदर्शन” भन्ने शीर्षकमा गहन बहस तथा विचार–विमर्श गरिएको थियो।

कार्यक्रमको विशेष आकर्षणका रूपमा वरिष्ठ पत्रकार राम भरत साहले आफ्नो दीर्घ पत्रकारिता अनुभव प्रस्तुत गर्दै विगतका संघर्षमय दिनहरूको स्मरण गरे। वहाँले विशेष गरी राजतन्त्रको समयमा स्वतन्त्र प्रेसको अभाव, अभिव्यक्ति स्वतन्त्रताको खुम्चिएको अवस्था, र पत्रकारमाथि परेका दवाव तथा दमनको सन्दर्भमा आफैंले भोगेका अनुभवहरू साझा गरे। उनले भने, “पत्रकारिता पेशा कहिल्यै सजिलो थिएन। साँचो तथ्य बोल्नका लागि त्यति बेला हामीले अनेकौ चुनौतीको सामना गर्नुपरेको थियो।”

नेपाल पत्रकार महासंघ धनुषाका उपाध्यक्ष अवधेश कामतले पत्रकारितामा अनुभवको सन्तुलन र पुस्तान्तरण आवश्यक रहेको औँल्याउँदै, पुराना पत्रकारका अनुभवबाट नयाँ पुस्ताले सिक्नुपर्ने बताए।

कार्यक्रममा कायापलटका कोषाध्यक्ष बलराम शाह, नेपाल पत्रकार महासंघ धनुषाका उपाध्यक्ष अवधेश कामत, महासंघका सदस्य कमलेश ठाकुर, महिला मानव अधिकार रक्षा सञ्जालकी प्रतिनिधि जमुना भुजेल,विभिन्न सञ्चार माध्यमका प्रतिनिधि र युवा पत्रकार लगायतको उपस्थिति थियो। सहभागीहरूले यस्ता संवादमुखी कार्यक्रमहरूले पुराना र नयाँ पुस्ताबीचको अनुभवको आदानप्रदानमा सहयोग पुग्ने र समकालीन पत्रकारिता अझ सुदृढ हुने अपेक्षा व्यक्त गरे।

कायापलट संस्थाले समाज रुपान्तरणमा पत्रकारिता, कला, मानव अधिकार तथा नागरिक सशक्तिकरणका विषयमा निरन्तर काम गर्दै आइरहेको छ। आयोजकले निकट भविष्यमा यस्तै थप कार्यक्रमहरू आयोजना गर्दै जाने प्रतिबद्धता जनाएका छन्।