जनकपुरधाममा नव निर्मित मैथिली भवनको भव्य उद्घाटन

जनकपुरधाम । मधेश प्रदेश सरकारको रु. ७ करोड ५० लाखको लगानीमा जनकपुरधामस्थित मैथिली विकास कोष अन्तर्गत निर्माण गरिएको ‘मैथिली भवन’को उद्घाटन कार्यक्रम भव्य रूपमा सम्पन्न भएको छ।

उक्त कार्यक्रममा प्रमुख अतिथिका रूपमा नेपाली कांग्रेसका सभापति तथा पूर्वप्रधानमन्त्री आदरणीय शेर बहादुर देउवा सहभागी भएका थिए।

मैथिली भाषा, साहित्य, संस्कृति र सभ्यताको संरक्षण, सम्वर्द्धन र प्रवर्द्धनका उद्देश्यले निर्माण गरिएको यो भवन मिथिला र मधेश क्षेत्रको सांस्कृतिक पहिचानलाई थप सुदृढ गर्न महत्वपूर्ण भूमिका खेल्ने विश्वास लिइएको छ।

उद्घाटन समारोहमा आयोजक संस्थाले यस ऐतिहासिक परियोजनालाई सफलतापूर्वक सम्पन्न गर्न सहयोग पुर्‍याउने सबै पक्षप्रति आभार व्यक्त गरेको छ।

कार्यक्रममा मधेश र मिथिलाको भाषा, संस्कृति तथा पहिचानको सम्मानलाई साझा अभियानका रूपमा अघि बढाउने प्रतिबद्धता समेत व्यक्त गरिएको थियो।

Tags: जनकपुरधाम