आसमान नेपालको सामाजिक परीक्षण कार्यक्रम जनकपुरधाममा सम्पन्न

गिरिजानन्द साह/धनुषा/जेठ २३ गते । आसमान नेपालले आफ्नो २६औँ वार्षिक उत्सवको अवसरमा जनकपुरधाममा सामाजिक परीक्षण कार्यक्रम सम्पन्न गरेको छ।

कार्यक्रम आसमान नेपालका अध्यक्षको अध्यक्षतामा सम्पन्न भएको हो । कार्यक्रमको प्रमुख अतिथि जिल्ला समन्वय समिति धनुषाका अध्यक्ष राजनन्दन मण्डल रहेको थियो भने अतिथिमा मिथिला बिहारी नगरपालिकाको नगर प्रमुख राजेन्द्र प्रसाद यादव र कमला नगरपालिकाको नगर प्रमुख विशेश्वर यादवको उपस्थित रहेका थिए।

आसमान नेपाल बालबालिका, किशोरकिशोरी र शिक्षा क्षेत्रको सशक्तिकरणमा क्रियाशील गैरसरकारी संस्था हो। बार्षिकोत्सवको अवसरमा आयोजित कार्यक्रममा समावेशी सहभागितामार्फत समाजमा आसमान नेपालको कार्यदिशा र प्रभावको समिक्षा हुने उद्देश्यका साथ कार्यक्रम आयोजना गरिएको थियो।

कार्यक्रममा आसमान नेपालले विगत एक वर्षमा गरेका प्रमुख गतिविधिहरू, परियोजनाहरूको अवस्था, उपलब्धि तथा सिकाइका पक्षहरूबारे विस्तृत प्रस्तुति दिइएको थियो। विशेषगरी बाल अधिकार, शिक्षा सुधार, किशोरकिशोरी सशक्तिकरण, लैङ्गिक समानता र सामाजिक उत्तरदायित्वका क्षेत्रमा संस्थाको योगदानबारे सहभागीहरूसामु प्रतिवेदन प्रस्तुत गरिएको थियो।

प्रस्तुतीपछी, कार्यक्रममा सहभागी सबै सरोकारवालासँग प्रतिक्रिया संकलन गरिएको थियो। अधिकांश सहभागीहरूले आसमान नेपालको कामप्रति प्रशंसा व्यक्त गर्दै भविष्यमा अझ प्रभावकारी ढंगले कार्यक्रम कार्यान्वयन गर्न सुझाव समेत दिएका थिए।

कार्यक्रमको समापन मन्तव्यमा अध्यक्षले आसमान नेपालले पारदर्शिता, जवाफदेहिता र सहभागितामूलक विकासमा जोड दिँदै आगामी दिनमा समेत समुदायसँग सहकार्यमा काम गर्ने प्रतिबद्धता जनाए। कार्यक्रममा साझेदार संस्थाका प्रतिनिधिहरू, शिक्षक, विद्यार्थी, जनप्रतिनिधि, पत्रकार तथा अन्य सरोकारवालाहरूको उल्लेखनीय उपस्थिति रहेको थियो।