गिरिजानन्द साह/धनुषा/जेठ १५ गते। प्रेस चौतारी नेपाल धनुषाले गणतन्त्र दिवसको अवसरमा विशेष छलफल कार्यक्रम सम्पन्न गरेको छ। “गणतन्त्र र युवा” विषयमा केन्द्रित यो कार्यक्रम नेपाल पत्रकार महासंघ धनुषाको सभाहलमा आयोजित गरिएको थियो।
कार्यक्रमको अध्यक्षता प्रेस चौतारी नेपाल धनुषाका सह-सचिव दिवाकर रायले गरेका थिए। कार्यक्रममा प्रेस चौतारी नेपालका केन्द्रीय सदस्य अवधेश कामत प्रमुख अतिथिका रूपमा सहभागी थिए। उनले आफ्नो सम्बोधनमा गणतन्त्रको स्थापना, यसको महत्व र युवाहरूको भूमिकामाथि प्रकाश पार्दै युवाहरूले लोकतान्त्रिक मूल्य र विधिलाई सशक्त रूपमा आत्मसात् गर्नुपर्नेमा जोड दिए।
कार्यक्रममा विशिष्ट अतिथिका रूपमा प्रेस चौतारी नेपाल धनुषाका पूर्व अध्यक्ष जगदीश साह, प्रेस चौतारी नेपाल मधेश प्रदेशका पूर्व सचिव भगलु मण्डल, र प्रेस चौतारी नेपालकी सदस्य ज्योति झा रहेका थिए। कार्यक्रममा वडा सदस्य मुन्नी दास अतिथिका रूपमा सहभागी थिइन्।
छलफल कार्यक्रम विद्यार्थीहरूसँग अन्तरक्रियात्मक रूपमा सम्पन्न भयो, जसमा विद्यार्थीहरूले गणतन्त्रको अवधारणा, पत्रकारिताको स्वतन्त्रता, र वर्तमान राजनीतिक परिप्रेक्ष्यमा युवाको भूमिका सम्बन्धी प्रश्नहरू राखेका थिए। सहभागीहरूले यस्ता कार्यक्रमहरू युवाहरूलाई नागरिक सचेतनामा अग्रसर बनाउने प्रयास भएको उल्लेख गरे। कार्यक्रममा धनुषा जिल्लाका विभिन्न शैक्षिक संस्थाबाट आएका विद्यार्थीहरूको उल्लेखनीय सहभागिता रहेको थियो। प्रेस चौतारी नेपाल धनुषाका तर्फबाट आयोजकहरूले कार्यक्रम सफल बनाउन सहयोग गर्ने सबैप्रति आभार व्यक्त गरेका थिए।
Discussion about this post